فایلی خەڵک؛ بۆنی غاز دانیشتووانی بەحرکەی هەراسان کردووە

ئاڤا نیوز

لەسەنتەری ناحیەی بەحرکە سێ شوێنی فرۆشتنی غاز و نەوت و گاز لەناو ماڵان هەیە، بەو هۆیەوە بۆنی ناخۆش بڵاو دەبێتەوە و هاووڵاتییانی نیگەران کردووە.

لێدوانی فەرمی: دانیشتوویێکی بەحرکە، بە ئاڤا میدیای ڕاگەیاند، لە نزیک مزگەوتی مەلا ڕەشید لەسەر ڕێگای سەرەکی بەحرکە، سێ شوێنی فرۆشتن و بارگاوی کردنی غاز و نەوت و گاز هەیە، بۆنی ناخۆش لەناو گەڕەکان بڵاودەبێتەوە بە تایبەتی کاتێک موبەریدە هەڵدەکەین بۆنەکە دەگاتە ژووری ماڵەکان کاریگەری لەسەر منداڵ و پەککەوتە و نەخۆش دروستکردووە.

بۆچوونی لایەنی بەرامبەر: تۆڵا مهدی، بەڕێوەبەری ناحیەی بەحرکە، بە ئاڤا میدیای ڕاگەیاند، ئەو شوێنانە دەستنیشانکراوە نووسراوی داخستنی شوێنەکان نێردراوە بۆ پۆلیس و پارێزگای هەولێر، چاوەڕێی جێبەجێکردنی فەرمانەکەین و شوێنەکان دابخەین و بگوازرێتەوە، چونکە ئەو شوێنانە کۆنن پێشتر ئەو شوێنە ئاوەدانی لێ نەبووە، بەڵام ئێستا ناوچەکە ئاوەدان بووە و دەبێت ئەو شوێنانە دابخرێن و بگوازرێنەوە بۆ دەرەوەی شار.