ئەردۆغان: دوای جەژن کار بۆ نووسینەوەی دەستووری نوێی تورکیا دەکەین

ئاڤا نیوز

ڕەجەب تەیب ئەردۆغان، سەرۆککۆماری تورکیا ڕایگەیاند، لیژنەیەکی 11 کەسیان لە پەرلەمانی تورکیا پێکهێناوە بۆ ئەوەی دوای جەژن کار لەسەر نووسینەوەی دەستووری نوێی تورکیا بکەن.

 

وێنە گەورەکە: پرسی نووسینەوەی دەستوور، جارێکی دیکە بووەتە ڕۆژەڤی تورکیا، ئەمەش دوای ئەوەی دەم پارتی داوای هەموارکردنەوەی دەستووری لە بەرژەوەندی کورد کردووە، ئاکپارتیش لاری لەسەر ئەم داوایەی دەم پارتی نییە، چونکە ئەویش ماوەیەکی زۆرە داوای نووسینەوەی دەستوورێکی نوێ بۆ تورکیا دەکات. 

 

ئەوەی پێویستە بیزانیت: پارتە ئۆپۆزسیۆنەکانی تورکیا دەنگ بە نووسینەوەی دەستووری نوێی تورکیا نادەن، "چونکە پێیان وایە، لە بەرژەوەندی دووبارە خۆ کاندیدکردنەوە ئەردۆغانە بۆ کورسی سەرۆکایەتییە".

 

لێدوانی فەرمی: سەرۆککۆماری تورکیا لە کاتی گەڕانەوەی لە ئازەربایجان لە ناو فڕۆکە بۆ ڕۆژنامەنووسان قسەی کرد و گوتی: دەستوورێکی نوێ و مەدەنی بەڵێنێکە ئێمە بە گەلەکەمان داوە و پاشگەزبوونەوە نییە. 

 

هەروەها، ئەردۆغان ڕەخنە لە پارتەکانی دیکە دەگرێت بەوەی ئەوان لە بانگەشەی هەڵبژاردنەکاندا بەڵێنی" دەستووری نوێ" دەدەن، کە دێتە سەرباری کردار کەس کرداری نییە." ئێمە هەنگاوی کرداریمان ناوە و 11 کەسمان بۆ کارکردن لەسەر دەستووری نوێ دیاریکردووە".

 

هەر لەبارەی دەستووری نوێوە سەرۆککۆماری تورکیا دەڵێت: لە دەستووری نوێدا، دیموکراسی بە‌هێزدەکەین، ماف و ئازادی لە ژێر چەتری دەستوورری نوێدا بەهێزتر دەبێت، کێشەکان لە دەستووری نوێدا چارەسەر دەکەن.