ئەپڵیکەیشنی ئەلیکترۆنی فۆرمی خۆراک لە هەولێر کارا کرا

ئاڤا نیوز

بەڕێوەبەرایەتیی ڕێکخستنی پسوولەی خۆراکی هەولێر دەڵێت: لە کاتژمێر شەشی ئێوارەی ئەمڕۆوە ئەپڵیکەیشنی ئەلیکترۆنی پسوولەی خۆراک کارا کراوە و سەرەتا بە شێوەی ئەزموونییە.

وێنە گەورەکە: بە ئەلیکترۆنیکردنی فۆرمی خۆراک لەڕێگەی ئەپڵیشکەیشنێکەوە، کۆتایی بە مامەڵەکردنی کاغەزیی دەهێنێت لە وەرگرتنی خۆراکی مانگانە، جگە لەوەی داتایەکی دروست لەبارەی بەشداربووان وەردەگیرێت.

ڕاگەیێنراوی فەرمی: بەڕێوەبەرایەتیی ڕێکخستنی پسوولەی خۆراکی هەولێر ڕایگەیاند، ئەپڵیکەیشنی پسوولەی خۆراک کارا کراوە و هاونیشتمانییان لە ئێستاوە دەتوانن دایبەزێنن، بەڵام تا ڕێککەوتی 2-6-2025 بەشێوەی ئەزموونی دەبێت و لە ڕۆژی دووشەممە بە ئامادەبوونی دەزگاکانی ڕاگەیاندن و بە ئامادەبوونی  نوێنەری وەزارەتی بازرگانیی عێراق بەفەرمی ڕادەگەێنرێ.

لەلایەکی دیکەوە: دلێر عەبدولواحید، بەڕێوەبەری گشتی بازرگانی کەل و پەلی خۆراکی هەولێر بە ئاڤای وت، بڕیارە لە ساڵی داهاتووەوە ئەوە بۆ ئەپڵیکەیشنەکە زیاد بکرێت، کاتێک مانگانە هاونیشتمانی دەچێت بۆ وەرگرتنی بەشەخۆراکەکەی ئۆکەیەک دەکات، ئەگەر دوو مانگ لەسەر یەک نەچێت ناوی لە بەشەخۆراک دەسڕێتەوە.