بڕیاری عێراق، لایەنە سیاسییە كوردستانییەكان لەسەر یەك مێز كۆ دەكاتەوە

ئاڤا نیوز

 

بڕیارەكەی تەیف سامی، وەزیری دارایی عێراق لە دژی مووچەخۆران و خەڵکی كوردستان، حیزب و لایەنە سیاسییەكانی هەرێمی كوردستان لەسەر یەك مێز كۆدەكاتەوە و بۆ یەکخستنی دەنگ و هەڵوێستان بەرامبەر حكومەتی عێراق.

 

وێنە گەورەکە: ڕاگرتنی مووچەی فەرمانبەرانی کوردستان بە بڕیاری تەیف سامی، وەزیری دارایی عێراق، کاردانەوەی حیزب و لایەنە سیاسییەکانی کوردستانی بەدوای خۆیدا هێنا و بە بڕیارێکی دژ بە بنەماکانی دەستوور ناوی دەبەن، پێشنیوەڕۆی ئەمڕۆش لە پیرمام زۆرینەی هێز و لایەنە سیاسییە کاریگەرەکانی کوردستان پێکەوە کۆدەبنەوە بۆ بڕیارێکی هاوبەش بەرامبەر بەغدا.

 

زانیاریی پەیامنێر: كوردستان حەسەن، پەیامنێری دیپلۆماسیی ئاڤا میدیا ڕایگەیاند: كۆبوونەوەی نێوان لایەنە سیاسییەكان كاتژمێر (11:00)ی پێش نیوەڕۆ لەسەر، داوای سەرۆك بارزانی و بانگهێشتنامەی پارتی دیموكراتی كوردستان بەڕێوە دەچێت، كۆبوونەوەیەكی بەپەلە و نائاساییە و شوێنی كۆبوونەوەكەش بارەگای مەكتەبی سیاسیی پارتی دیموكراتی كوردستانە لە پیرمام.

 

زانیاریی زیاتر: بەپێی زانیارییەكانی ئاڤا میدیا، هەریەك لە پارتی دیموكراتی كوردستان، یەكێتیی نیشتمانیی كوردستان، پارتی سۆسیال دیموكراتی كوردستان، زەحمەتكێشان، پێكهاتەكان و بەشێك لە بزووتنەوەی گۆڕان، لە كۆبوونەوەكە بەشدار دەبن، لە كۆبوونەوەكەدا بە چڕی گفتوگۆ سەبارەت بە هەڵوێستەكانی ئەم دواییەی بەغدا بەرامبەر بە هەرێمی كوردستان و ڕاگرتنی مووچەی فەرمانبەرانی هەرێمی كوردستان لەلایەن وەزارەتی داراییەوە دەكرێت و كۆدەنگییەك سەبارەت بە هەڵوێستی كورد لەمبارەیەوە دروست دەكرێت.