مەشعان جبووری: كشانەوەی كورد لە پرۆسەی سیاسی، عێراق دەهەژێنێت

ئاڤا نیوز

 

مەشعان جبووری، سیاسەتوانی دیاری عێراقی و ئەندامی خولەكانی پێشووی پەرلەمان ڕایدەگەیەنێت، كشانەوەی كورد لە پرۆسەی سیاسی ڕووداوێك نییە بە ئاسایی تێپەڕێت، بەڵكو بوومەلەرزەیەکە كە سەقامگیریی عێراق دەهەژێنێت.

 

وێنە گەورەكە: بڕیارەكەی ڕۆژی 28-5-2025ـی  وەزارەتی دارایی عێراق بە ڕاگرتنی مووچەی هەرێمی كوردستان، كاردانەوەی زۆری ناوخۆیی و جیهانی بەدوای خۆیدا هێنا، ئەمڕۆش بەشێك لە لایەنە سیاسییەكانی هەرێمی كوردستان لەسەر بانگهێشتنامەی فەرمی پارتی دیموكراتی كوردستان، لە سەڵاحەددین كۆبوونەتەوە و گفتوگۆی ئەگەر و پێشهاتەكان دەكەن.

 

لێدوانی فەرمی: مەشعان جبووری، سیاسەتوانی دیاری عێراقی و ئەندامی خولەكانی پێشووی پەرلەمان، لە پێگەی فەرمی خۆی لە تۆڕی كۆمەڵایەتیی 'ئێكس' نووسیویەتی، "کورد هاوبەشی سەرەکیی بوون لە ڕووخاندنی  ڕژێمی سەدام و کردنەوەی دەرگای نێودەوڵەتی بەڕووی ئۆپۆزسیۆن، کشانەوەیان لە پرۆسەی سیاسی تەنیا غیابی پێكهێنەرێكی سەرەكیی عێراق نییە، بەڵکو ڕووخانی بەشێکی شەرعییەتی نیشتمانییە، زۆر زەحمەتە عێراق بتوانێت بەرپرسیاریەتیی دەرئەنجامەكانی ئەو بڕیارەی کورد هەڵبگرێت."