وەبەرهێنەر و کۆمپانیا فەرەنسییەکان ڕوو لە هەرێمی کوردستان دەکەن

ئاڤا نیوز

 

بڕیارە لە داهاتوویەکی نزیکدا چەند وەبەرهێنەر و کۆمپانیایەکی بەناوبانگی فەرەنسی ڕوو لە هەرێمی کوردستان بکەن.

 

وێنە گەورەکە: حکومەتی هەرێمی کوردستان لە فرەچەشنکردنی سەرچاوەکانی داهات بەردەوامە و هانی کۆمپانیا بیانییەکان دەدات کە وەبەرهێنان بکەن، بەئامانجی گەشەپێدان و بووژانەوەی زیاتری كەرتەکە کارئاسانی بۆ وەبەرهێنەر و کۆمپانیا گەورەکان دەکات تاوەکو پرۆژەکانیان بهێننە ناوچەکە.
 
لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤای ڕاگەیاند: لە چوارچێوەی کۆڕبەندی ئابووری و بازرگانیی نێوان کوردستان، فەرەنسا و عێراق، چەند کۆمپانیا و وەبەرهێنەرێکی فەرەنسیمان بینی، لەبارەی دەرفەتەکانی وەبەرهێنان لە کوردستان گفتوگۆمان کرد، هەروەها پاڵپشتی و کارئاسانی حکومەتمان بۆ دووپاتکردنەوە.

 

- بە گوتەی بەرگەشت ئاکرەیی، لە داهاتوویەکی نزیکدا ژمارەیەک وەبەرهێنەر و کۆمپانیای فەرەنسی سەردانی هەرێمی کوردستان دەکەن و لە سێکتەرە جیاوازەکاندا وەبەر‌هێنانیان دەبێت.

 

باگکراوند: رۆژی 26-5-2025، شاندێکی وەبەرهێنەرانی کوردستان بە سەرپەرشتیی د. محەممەد شوکری، سەرۆکی دەستەی وەبەرهێنان لە پاریسی فەرەنسا بەشدارییان لە کۆربەندی ئابووری و بازرگانیی هەرێمی کوردستان، فەرەنسا و عێراقدا کرد، لە کۆڕبەندەکە زیاتر لە 310 وەبەرهێنەر و بازرگان بەشدار بوون کە زۆرینەیان فەرەنسی بوون.