لە یەکەم ڕۆژی جەژن منداڵێک لە زێی گەورە دەخنکێت

ئاڤا نیوز

منداڵێکی تەمەن حەوت ساڵان لە شارەدێی دێرەلووکی سەر بە قەزای ئامێدی کەوتە ناو ئاوی زێی گەورە و خنکا و تا ئێستا تەرمەکەی نەدۆزراوەتەوە.

چیرۆكی سەرەكی: ئەمڕۆ هەینی، لە یەكەم ڕۆژی جەژندا، خێزانێك بە مەبەستی سەردانیكردنی خزم و كەسوكاریان، ڕوویان لە شارەدێی دێرەلووكی سەر بە قەزای ئامێدی كردووە، بەهۆی نزیكبوونەوەی لە كەناری زێ، منداڵێكی تەمەن حەوت ساڵانی خانەوادەكە بەناوی ئارڤان سیهاد، دەكەوێتە نێو ئاو و خنكاوە، بەهۆی تەوژمی بەهێزی ئاوەكە و ڵێڵبوونی، تا ئێستا نەتوانراوە تەرمەكەی بدۆزرێتەوە و تیمەكانی بەرگریی شارستانی و خەڵكی ناوچەكە لە هەڵمەتی گەڕان بۆ دۆزینەوەی تەرمەكەی بەردەوامن.

زانیاریی بەدەستهاتوو: کاروان عەلی، پەیامنێری ئاڤا میدیا لە دهۆك ڕایگەیاند، بە كاتی شەویش گەڕان بۆ دۆزینەوەی منداڵە خنكاوەكە بەردەوامە، بەڵام هەروەك تیمەكانی بەرگریی شارستانی ئاماژەی پێ دەكەن بەهۆی ڵێڵی ئاوەكە و بەهێزی تەوژمەكەی، دیار نییە تەرمەكەی بە كام لای زێدا كەوتووە.

زانیاریی زیاتر: سیهاد عوسمان، باوكی منداڵە خنكاوەكە، ماوەی چەند كاتژمێرێكە بەدیار ئاوی زێی گەورەوە دانیشتووە و چاوەڕێی دۆزینەوەی تەرمی جگەرگۆشەكەیەتی، ئەو دیمەنەش چیرۆكی خەمناكی خنكانی ئاڤێستا یوسف، بیر هەموو لایەك دەخاتەوە كە لە ڕۆژی 5ـی مانگی نیسانی ئەمساڵ، لە ئاوی ڕووباری تەنگاتوور خنكا و تاوەكو ئێستا تەرمەكەی نەدۆزراوەتەوە.