لە ڕۆژانی جەژن زیاتر لە 100 کەس لە کاتی قوربانیکردن بریندار بوون

ئاڤا نیوز

 

لە ماوەی دوو ڕۆژی جەژندا زیاتر لە دوو هەزار کەس بەهۆکاری جیا جیا سەردانی نەخۆشخانەکانی ڕزگاری  و ڕۆژئاوایان لە هەولێر کردووە کردووە. لەو ژمارەیەش، بەشێکیان بەهۆی قوربانیکردنەوە بریندار بوون و لەوێ چارەسەریان وەرگرتووە.

 

وێنە گەورەکە: له‌ ڕۆژانی جه‌ژنی قورباندا له‌ نه‌خۆشخانه‌ و بنكه‌ ته‌ندروستییه‌كانی هه‌ولێر و شارەکانی دیکەی هەرێمی کوردستان ده‌وام ئاساییه‌، پێشوازیی له‌ نه‌خۆش ده‌كرێت و خزمه‌تگوزارییه‌ ته‌ندروستییه‌كان پێشكه‌ش ده‌كرێن. بەهۆی ڕووداوی هاتووچۆ، ژەهراوی بوون، خواردن، شەڕکردن، هۆکارەکانی دیکە، لە ماوەی دوو ڕۆژی جەژنی قورباندا نزیکەی دوو هەزار کەس سەردانی هەردوو نەخۆشخانەی ڕزگاری و ڕۆژئاوایان لە شاری هەولێر کردووە.

 

لێدوانی فەرمی: د. كاروان یاسین نانه‌كه‌لی، به‌ڕێوه‌به‌ری‌ نه‌خۆشخانه‌ی فریاكه‌وتنی ڕۆژئاوای هه‌ولێر بە ئاڤا میدیای ڕاگەیاند،  "لە دوو ڕۆژی جەژنی قورباندا زیاتر لە 1100 کەس سەردانی نەخۆشخانەی ڕۆژئاوای کردووە و چارەسەری پێویستی بۆ کراوە، لە ژمارەیەش نزیکەی 123کەسیان  لە کاتی سەربڕینی ئاژەڵی قوربانیدا  بریندار بوونە و بەشێکیان نەشتەرگەریی خێرایان بۆ کراوە بەهۆی ئەوەی دەماری خۆیان بڕیوە، ئەو کەسانەی بەهۆی قوربانیکردن بریندار بوون، زۆربەی قەساب بوون لەکاتی قوربانیکردن و سەربرینی ئاژەڵ بە چەقۆ بریندار بوون و بەشێکیانیش هاووڵاتیی ئاسایی بوون.

 

لەلایەکی دیکەوە: نەخۆشخانەی ڕزگاری فێرکاریی  هەولێر ڕایگەیاندووە، لە ماوەی دوو ڕۆژی جەژنی قورباندا 779 کەس سەردانی نەخۆشخانەی کردووە و، لەلایەن پزیشکان و کارمەندانی تەندروستی پێشوازیان لێکراوە و چارەسەری پێویستیان بۆ کراوە.

ئەوەی پێویستە بیزانیت: ئامارەکانی دووەم ڕۆژی جەژنی قوربان لە نەخۆشخانەی ڕزگاری/ بەشی فریاکەوتن، بەم شێوەی خوارەوە بووە:
-    سەردان بەگشتی 779 کەس.
-    ڕاوێژکاری 654 کەس.
-    فریاکەوتن 125 کەس
-    ڕووداوی هاتووچۆ و ماتۆڕسکیل 4 کەس.
-    بەربوونەوە 5 کەس.
-    سکچوون و ڕشانەوە 8 کەس.
-    پێوەدان 1کەس.
-    ژەهراوی بوون بەدەرمان 1کەس.
-    شەڕ 2 کەس.
-    مردن 1 کەس.
-    نەشتەرگەری 4 کەس.
-    تاقیگە 495 پشکنین کەس.
-    تیشک/ 350 کەس..
-    سیتی سکان 20 کەس
-    سۆنار 110 کەس.