نزیكەی 50 كۆمپانیای كوردستان بەشداری كۆڕبەندی ئابووریی هۆڵەندا دەكەن

ئاڤا نیوز

شاندێکی باڵای حکومەتی هەرێمی کوردستان بەیاوەری کۆمپانیاکانی وەبەرهێنانی کەرتی تایبەت، بۆ بەشداریکردن لە کۆڕبەندی ئابووریی هۆڵەندا - کوردستان ئێستا لە شاری لاهای ئامادەن و لەماوەی سێ ڕۆژی کۆڕبەندەکەدا، ژمارەیەک گرێبەستی بایەخداری سێکتەری کشتوکاڵ واژۆ دەکەن.

 

چیرۆکی سەرەکی: لە ڕۆژانی 9 تاوەکوو 12ـی ئەم مانگە، بە بەشداری شاندی باڵای وەزارەتی کشتوکاڵی هەرێمی کوردستان و دەستەی وەبەرهێنان و ژوورەکانی بازرگانی و پیشەسازیی شارەکانی هەرێمی کوردستان و نزیکەی 50 کۆمپانیای وەبەرهێنانی کەرتی تایبەت لە هەرێمی کوردستان، هاوشانی دەزگا پەیوەندیدارەکانی حکومەتی هۆڵەندا و 50 کۆمپانیای کەرتی تایبەتی ئەو وڵاتە، کۆڕبەندی ئابووریی هۆڵەندا - کوردستان بەڕێوە دەچێت.

 

لێدوانی فەرمی: د. محەممەد شوکری، سەرۆکی دەستەی وەبەرهێنانی هەرێمی کوردستان، تایبەت بە ئاڤا ڕایگەیاند، ئەمە جاری یەکەمە کۆڕبەندی لەمجۆرە بکرێت، ئامانج لێی ناساندن و ڕەخساندنی دەرفاتی زیاترە بۆ کۆمپانیا وەبەرهێنەرەکانی هەردوو وڵات و ڕاکێشانی دەستی کار و بازرگانی.

 

بابەتە ستراتیژییەکە: لە دوو ڕۆژی کۆڕبەندەکە، دوو گرێبەستی گەورە و گرنگ لە بواری شیرەمەنی و بواری چاندنی تۆوی پەتاتە و چەند بابەتێکی دیکەی کشتووکاڵی،  لەنێوان کۆمپانیا کوردستانییەکان و کۆمپانیا هۆڵەندییەکان واژۆ کرا، ئەمەش بە وتەی سەرۆکی دەستەی وەبەرهێنانی هەرێمی کوردستان.

 

زانیاریی زیاتر: بەشداریکردن لە کۆڕبەندی ئابووریی هۆڵەندا- کوردستان، درێژەپێدەری پرۆگرامێکی درێژخایەنە کە هەرێمی کوردستان بە هاوکاری فەرمانگەی پەیوەندییەکانی دەرەوەی حکومەتی هەرێمی کوردستان، لە چەند سێکتەرێکی جۆراوجۆری کشتوکاڵی و پیشەسازی لەگەڵ وڵاتان ئەنجامی دەدات.

 

ئەوەش بزانە: بەشداریی کەرتی تایبەت لەپاڵ کەرتی حکومی لەوجۆرە کۆڕبەند و چالاکییە ئابووریی و بازرگانیانە، پلان و بەرنامەی سەرۆکوەزیرانی هەرێمی کوردستانە، کە ڕۆڵی دەبێت لە سەرکەوتنی گەشەی ئابووریی هەرێمی کوردستان.