دەسەڵاتدارانی سووریا داوا لە ژنان دەکەن جلی بۆرکینی لەبەر بکەن

ئاڤا نیوز

وەزارەتی گەشتوگوزاری سووریا داوا لە ژنان دەکات لەمەلەوانگەکان  و سەیراندا بۆرکینی لەبەر بکەن و داواش لە پیاوان دەکات لەکاتی مەلەکردن سنگیان لە دەرەوەی ئاو دەرنەخەن.

چیرۆکی سەرەکی: سەبارەت بەپۆشینی جلوبەرگ،  ئەمڕۆ سێشەممە 10-6-2025 وەزارەتی گەشتوگوزاری سووریا ڕینمایی نوێی بۆ ئەو گەشتیارانە دەرکرد کە سەردانی مەلەوانگە و کەناری دەریا و شوێنەگشتییەکان دەکەن.

نووسراوی فەرمی: لەنوسراوێکی فەرمیدا وەزارەتی گەشتوگوزاری سووریا داوا لە ژنان دەکات لە ئەگەری گەڕانیان لە کەنار دەریا و شوێنە گەشتیارەکانی دیکەدا، لە سەر جلی مەلەکردن جلێکی درێژ لەبەر بکەن بەجۆرێک هەموو شان و ئەژنۆیان بپۆشێت.

لەهەمان کاتدا: وەزارەتەکە داوا لەپیاوان دەکات دەبێت لەدەرەوەی ئاودا کراس لەبەربکەن، لە هۆڵی پیشوازی و هوتێلەکانیش بەڕووتی و بەبێ لەبرکردنی کراس دەرکەتنیان قەدەغەیە.

ئەوەی پێویستە بیزانیت: لە هۆتێل و شوێنە گەشتیارییە چوار ئەستێرەکان، وەزارەتی گەشتوگوزاری سووریا ڕێگە بە گەشتیاران دەدات جلوبەرگی مەلەوانی ڕۆژئاوایی ئاسایی بپۆشن، بە مەرجێک لەگەڵ داب و نەریت و ئادابی کۆمەڵگە بگونجێت.