گرووپێکی چەکداری عێراقی هەڕەشە لە ئەمریکا دەکات

ئاڤا نیوز

گرووپێکی نێو بەرەی مقاوەمەی ئیسلامی لە عێراق لە ئەگەری هەڵگیرسانی جەنگ دژی ئێران، هەڕەشەی هێرشکردنە سەر بەژەوەندییەکانی ئەمریکا لە عێراق دەکات.

وێنە گەورەکە: دوای بێدەنگییەی زۆر، جارێکی دیکە گرووپە چەکدارەکانی عێراق دەستیان بە هەڕەشەو گوڕەشەکانیان بۆ لێدان لە بەرژەوەندییەکانی ئەمریکا لە عێراق کردەوە.

پەیامی فەرمی: ئەبو ئالاء ئەلوەلائی، ئەمینداری گشتیی کەتیبەکانی "سەیدولشوهەدا" لە پۆستێکیدا لە تۆڕە کۆمەڵایەتییەکان هەڕەشەی ناردنی دەیان خۆکوژ بۆ هێرشکردنە سەر بەژەوەندییەکانی ئەمریکا دەکات لە ئەگەری هەڵگیرسانی جەنگ دژی ئێران.

لە هەمان کاتدا: وەلائی نووسیویەتی: "ئەگەر جەنگ هەڵگیرسا، سەدان گیانلەسەردەست لە ئامادەباشیدا دەبن و جارێکی دیکە لووتبەرزیی ئەمریکا دەشکێنرێت، هەروەک چۆن یەکەمجار لە عێراق شکێنرا کاتێک بە سەرشۆڕییەوە کشایەوە."

"ئەمجارە نە هیچ شوێنپێیەکی (ئەمریکا) لە ڕۆژهەڵاتی ناوەڕاستدا دەمێنێتەوە و نە هی بەکرێگیراوەکانیشی، ئەو سیستەمانەی کە داگیرکاری دەیپاراستن دەڕوخێن، ئەو کاتە سەرکەوتن بۆ خودا و بەندە دڵسۆزەکانی دەبێت."

ئەوەی پێویستە بیزانیت: گرژییەکانی ناوچەکە ڕوویان لە زیادبوون کردووە، ئەمەش دوای لێدوانەکانی عەزیز نەسیر زادە، وەزیری بەرگریی ئێران، کە تێیدا هەڕەشەی لێدان لە بنکەکانی ئەمریکای لە ناوچەکە کردبوو ئەگەر ناکۆکییەک لەگەڵ واشنتن لەسەر دۆسیەی ئەتۆمی سەرهەڵبدات."