تورکیا 48 فڕۆکەی سەربازی هەناردەی ئەندەنوسیا دەکات

ئاڤا نیوز

ڕەجەب تەیب ئەردۆغان، سەرۆککۆماری تورکیا ئەوەی دەڵێت، تورکیا 48 فڕۆکەی سەربازی جۆری ''کان" هەناردەی وڵاتی ئەندەنوسیا دەکات. ئەمەش داوی ئەوەی ڕێککەوتنی بەرگری پیشەسازی لەنێوانیان واژۆکرا.

چیرۆکی سەرەکی: توساش، پیشەسازی فڕۆکەوانی و بۆشایی ئاسمانی تورکیا، لە پێشانگای INDO Defense 2025 کە لە ئەندەنوسیا بەڕێوەچوو، رێککەوتنێکی بۆ فرۆشتنی فڕۆکەی جۆری 'کان' کرد، لە چوارچێوەی رێککەوتنەکەدا، 48 فڕۆکەی جەنگی نەوەی پێنجەم دەگەیەنرێتە ئەندەنوسیا.

لێدوانی فەرمی: ڕەجەب تەیب ئەردۆغان، سەرۆککۆماری تورکیا لە تۆڕی کۆمەڵایەتی ئێکس ڤیدیۆیەکی بڵاوکردووەتەوە کە "خۆی چووەتە ناو فڕۆکە سەربازییەکە" تاقی دەکاتەوە. نووسیویەتی، "لە چوارچێوەی ئەو ڕێککەوتنەی لەگەڵ وڵاتی ئەندەنوسیای دۆست و هاوڕێ، واژۆمان کردووە، 48 فڕۆکەی سەربازی جۆری "کان" لە تورکیا بەرهەمدەهێنرێت و هەناردەی ئەو وڵاتەی دەکەین".

باکگراوند: "کان" کە لەلایەن تورکیا پەرەی پێدرا و بەرهەم هێنرا، بە سەرکەوتوویی یەکەم گەشتی خۆی لە 21ـی شوباتی 2024 ئەنجامدا، بەم هەنگاوە سەردەمێکی نوێ لە ڕووی پێشکەوتنی پیشەسازی بەرگری و  فڕۆکەوانی تورکیا، دەستپێکرد.