سوپای پاسدارانی ئێران: ئامادەین بۆ ڕووبەڕووبوونەوەی هەر سیناریۆیەک

ئاڤا نیوز

ئێران هۆشداری دەدات لەهەر هەنگاوێکی ئیسرائیل بەرامبەر وڵاتەکەی، فەرماندەی سوپای پاسدارانیش دەڵێت، دوژمن ئاگادار دەکەنەوە هەڵە نەکەن و بەوردی بیر لە دەرئەنجامی کارەکانیان بکەنەوە.

وێنە گەورەکە: گرژییەکانی نێوان ئێران و ئیسرائیل گەیشتووەتە لووتکە و پێشبینییەکانیش بۆ ئەوەن کە ئیسرائیل هێرشی سەربازی بکاتە سەر ئێران، بەڵام تا ئێستا ئەمریکا ڕێگرە لەو هەنگاوە و دەیەوێت بە گفتووگۆ چارەسەری ناکۆکییەکانی لەگەڵ ئێران بکات.

زانیاریی بەدەستهاتوو: میدیاکانی ئەمریکا بڵاویانکردەوە، لە چەند ڕۆژی داهاتوودا ئیسرائیل بەبێ هاوکاری ئەمریکا هێرش دەکاتە سەر ئێران و سوپای پاسدارانی ئەو وڵاتەش، دەڵێن ئامادەین.

لێدوانی فەرمی: حوسێن سەلامی، فەرماندەی سوپای پاسدارانی ئێران ڕایگەیاند، ئیسرائیل ناتوانێت ڕووبەڕووی گەنجانی یەمەن ببێتەوە، چۆن دەتوانێت دژی ئێمە بوەستێت. دوژمنانمان ئاگادار دەکەینەوە کە هەڵە نەکەن و بەوردی بیر لەدەرئەنجامی کارەکانیان بکەنەوە، و ئامادەین بۆ ڕووبەڕووبوونەوەیان.

زانیاریی زیاتر: سەلامی دەڵێت، "دوژمن دەیەوێت نەتەوەی ئێران گۆشەگیر بکات و دەرگا سیاسییەکانی جیهان بەسەر ئێراندا دابخات و  گەمارۆکان چڕتر بکاتەوە، بەڵام ئێران ئەمڕۆ له هاوکێشه ناوچەیی و جیهانییەکاندا هێنده کاریگەری هەیه که بەبێ بوونی کۆماری ئیسلامی ئێران هیچ کێشەیەک چارەسەر ناکرێت".

"دوژمن هەندێک جار هەڕەشەی سەربازی دەکات، بەڵام ئێمە هەمیشە وتمان و دەڵێین ئێستا ئامادەین بۆ هەر سیناریۆیەک و هەر بارودۆخێک و هەر مەرجێک، ئێمە ئەزموونی شەڕمان هەیە، تاقیمان کردووەتەوە، هێزمان بوونیادناوە، ستراتیژیمان هەیە، ئامانجەکانمان دەستنیشان کردووە، پلانمان پراکتیزە کردووە، دەسەڵاتیشمان فراوانتر کردووە".