جووڵەی بازرگانی و گەشتیاری لە دەروازەی حاجی ئۆمەران ئاساییە

ئاڤا نیوز

بەگوێرەی ئەو زانیارییانەی دەست ئاڤا کەوتووە، سەرەڕای زیادبوونی بارگرژییەکانی نێوان ئیسرائیل و ئێران، هاتوچۆی بازرگانی و گەشتیاری لە دەروازەی نێودەوڵەتیی حاجی ئۆمەران ئاساییە، و ژمارەیەکی زۆری خەڵک لە ئێران دەگەڕێنەوە.

وێنە گەورەکە: بەرەبەیانی ئەمڕۆ هەینی ئیسرائیل هێرشێکی فراوانی بۆ سەر پێگە سەربازیی و بنکە ئەتۆمییەکانی ئێران دەستپێکرد، بەشێکی زۆری شارەکانی ئێران بە ڕۆژهەڵاتی کوردستانیشەوە بە ئامانج گیران.

زانیاریی بەدەستهاتوو: ئاڤا لە سەرچاوەیەکی دەروازەی نێودەوڵەتیی حاجی ئۆمەران زانیویەتی، ژمارەیەکی زۆری هاونیشتمانی بۆ پشووی جەژنی قوربان سەردانی ئێرانیان کردبوو، ئەمڕۆ بە دەروازەکە گەڕانەوە خاکی هەرێمی کوردستان. سەرەڕای زیادبوونی بارگرژییەکان، بەڵام جووڵەی بازرگانی و گەشتیاری نەوەستاوە، تەنیا هێندە نەبێت ژمارەیەکی کەمی خەڵک لە باشوورەوە دەچن بۆ ئێران.

ئەو سەرچاوەیە ئەوەش دەڵێت: ئەمڕۆ بۆ ماوەی کاتژمێرێک بەهۆی بوونی کێشە لە سیستمی دەروازە لە دیوی مەرزی تەمرچین لە ئێران هاتووچۆ وەستا، بەڵام دواتر گرفتەکە چارەسەر کرا و هاتووچۆ ئاسایی بووەوە.