شاندی حەماس کۆتایی بە سەردانە فەرمییەکەی بۆ عێراق هێنا و ئەنجامەکەی ئاشکرا دەکات

ئاڤا نیوز

شاندێکی باڵای بزووتنەوەی حەماس سەردانە فەرمییەکەی بۆ بەغدای پایتەخت کۆتایی پێهێنا، کە تێیدا زنجیرەیەک دیدار و کۆبوونەوەی لەگەڵ سەرکردە و بەرپرسانی سیاسیی عێراق ئەنجامدا.

ئەوەی پێویستە بیزانیت: سەردانی شاندی حەماس بۆ عێراق لە کاتێکدایە کە هەوڵی دیپلۆماسیی چڕ لە ناوچەکەدا بەردەوامە بۆ ڕووبەڕووبوونەوەی قەیرانەکانی فەلەستین. لە چوارچێوەی هەوڵەکان بۆ وەستاندنی شەڕ و چارەسەرکردنی دۆخی مرۆیی لە کەرتی غەززە. عێراقیش وەک یەکێک لە وڵاتەکانی ناوچەکە، ڕۆڵی لە پشتگیریکردنی دۆزی فەلەستیندا دەبینێت.

ڕاگەیێنراوی فەرمی: بەگوێرەی ڕاگەیێنراوی حەماس، شاندەکەیان بە سەرۆکایەتیی ئوسامە حەمدان و ڕاوێژکاری ڕاگەیاندنی سەرۆکی بزووتنەوەکە، تاهیر نوونوو، گفتوگۆیان لەسەر ڕێکارەکانی جێبەجێکردنی ڕێککەوتنی ئاگربەست و دوایین گۆڕانکارییە سیاسی و مەیدانییەکان کردووە، جگە لە تاوتوێکردنی پەرەسەندنە ناوچەیی و نێودەوڵەتییەکان.

زانیاریی زیاتر: بەپێی ڕاگەیێنراوەکەی حەماس، شاندەکە باسی دۆخی مرۆیی سەختی کەرتی غەززە و تاوانەکانی ئیسرائیلیان کردووە، جەخت لەسەر پێویستیی یەکخستنی هەوڵەکان کراوەتەوە بۆ وەستاندنی ئەم تاوان و دەستدرێژییە بەردەوامانە.

شاندەکە دووپاتی کردەوە کە پەیوەندییەکی مێژوویی قووڵیان لەگەڵ عێراق و هەموو پێکهاتە سیاسی و حزبییەکانی هەیە، هەروەها ستایشی هەڵوێستە نەگۆڕەکانی عێراقیان کرد لەبارەی دۆزی فەلەستینەوە.