پسپۆرێک: تەقاندنەوەی وێستگەی ئەتۆمی ئێران زیان بە هەرێمی کوردستانیش دەگەیێنێت

ئاڤا نیوز

پسپۆڕێکی تیشک و ناوکی هۆشداری لە بڵاوبوونەوەی کاریگەری تەقاندنەوەی وێستگە ئەتۆمییەکانی ئێران دەدات، بەلایەنی کەمەوە کاریگەری تیشکدانەوە و دەردانی ماددەکانی بەدووری 70 کیلۆمەتر دەچێت.

چیرۆکی سەرەکی: بەرەبەیانی ڕۆژی هەینی 13-6-2025، سوپای ئیسرائیل بە سەدان مووشەک هێرشی چڕی کردە سەر دەیان بنکەی سەربازی و دامەزراوەی ئەتۆمی لە سەرتاسەری ئێران و بەهۆیەوە 78 هاووڵاتی کوژران و 320 کەسی دیکەش برینداربوون، هۆشداری دەدرێت لە بڵاوبوونەوەی کاریگەری سەر تەقاندنەوەی وێستگە ئەتۆمییەکان.

لێدوانی فەرمی: د. عەلی حەسەن، پسپۆڕی تیشک و ناوکی بە ئاڤای گوت، "زیانی بەئامانجگرتنی ئەو وێستگانە بۆ دەورووبەری ئەو شوێنە دەبێت کە پێککراوە، ئینجا کاریگەرییەکەی هەرێمی و دواتر جیهانی دەبێت، بەگوێرەی پلەبەندی و قووڵبوونەوەی پێککرانی ئامانجەکە."

د.عەلی حەسەن ئەمانەشی گوت:-

"زیان لە ژینگەکەیان دەدات، ئەو تیشکە ئەگەر وەک ماددە بێتە دەرەوە، کاریگەرییەکەی زۆر خراپتر دەبێت، ماددەکە بەدووری 70 کیلۆمەتر بڵاودەبێتەوە  لەنزیکی ئەو وێستگانەی کە بەئامانج گیراون."

"ئەگەر لە دڵی ڕیاکتەرەکەی دابێت، مەترسیدارن و مەترسییەکی بەرفراوانی دەبێت، ئەمە واتە بگاتە پلەی حەوت و دیزاستەر مەترسی تیشکەکان فراوان دەبێت، مەترسی بڵاوبوونەوەی بە مەودایەکی درێژتر هەیە و کاریگەری نەرێنی لەسەر ناوچەکە هەیە."

چارەسەرەکان چین؟

ئەگەر لەدەرەوە و نزیک لە وێستگەکە بوون یەکسەر پێویستە بڕۆنە ماڵەوە و چارەسەری پێویست وەرگرن، ئەگەریش لە ماڵێکی نزیک وێستگەکە بن هەموو دەرگا و پەنجەرەکان داخەن، ئەگەریش لە دەرەوە بەر تیشکەکە کەوتن یەکسەر جل و بەرگەکانتان بگۆڕن و چەند ڕۆژێک خۆتان کەرەنتینە بکەن، ئەو خواردن و خواردنەوانە بەکاربهێنن کە سەریان داخراوە، ئینجا پێویستە بە ئاو و سابوون خۆی بشوات.

هەر کاتێکیش تووشی سکچوون و ڕشانەوە بوون، یەکسەر سەردانی نەخۆشخانە بکرێت بەمەبەستی وەرگرتنی چارەسەر.