ئیسرائیل شاری مەشهەدی بۆردوومان كرد كە دوورترین ئامانجە

ئاڤا نیوز

لە سێیەم ڕۆژی جەنگی نێوان ئیسرائیل و ئێران، هێرشەكانی ئیسرائیل گەیشتە شاری ئایینی مەشهەد لەوپەڕی سنوورەكانی ئێران، ئەوەش دوورترین ئامانجە كە لە سەرەتای شەڕەكەوە لەلایەن ئیسرائیلەوە پێكرابێت.

زانیاریی بەدەستهاتوو: میدیاكانی ئێران ئاماژەیان بەوە كردووە كە دوو شوێن لە شاری مەشهەد لە باكووری ڕۆژهەڵاتی ئێران، كراونەتە ئامانج؛ فرۆكەخانەی مەشهەد و شوێنێك لە شەقامی 17ـی شەهریوەر، قەبارەی هەردوو تەقینەوەكە، ترس و دڵەڕاوكێی لەلای دانیشتووانی شارەكە دروستكرد.

ئەوەی لەبارەیەوە دەوترێت: سەرچاوە ئێرانییەکان باس لەوە دەکەن کە شانە سیخوڕییەکانی مۆساد لە ئێراندا فڕۆکەخانەی مەشهەدیان کردووەتە ئامانج، نەک لە ڕێگەی فڕۆکەی جەنگی یاخود درۆنی ئیسرائیلییەوە بۆردومان كرابێت.

پێدراوە ڕاستییەكان: بەگوێرەی گرتە ڤیدیۆکان بێت، سیستمی بەرگریی ئاسمانیی لە شاری مەشهەد خراوەتە کار و بەرپەرچی هێرشەکانی ئیسرائیل دەداتەوە، سوپای پاسدارانیش دەڵێت هیچ زیانێک بەر فڕۆکەخانەکە نەکەوتووە.

زانیاریی زیاتر: بەهۆی ئەوەی مەزاری ئیمام ڕەزا، یەكێك لە ئیمامە پلە باڵاكانی پەیڕەوانی شیعەمەزهەبی لەخۆگرتووە، مەشهەد بە یەكێك لە شارە ستراتیژی و گرنگەكانی ئێران دادەنرێت.

بەتەنیشت ئەم بابەتەوە: سوپای پاسداران ئاماژەی بەوەكردووە، هەر ئێوارەی ئەمڕۆ ئیسرائیل شاری ئایینی قومی بۆردوومان کردووە و سێ شوێنی شارەكەی بەئامانج گرتووە.