هێرشی مووشەکی ئێران بۆ سەر ئیسرائیل دەستیپێکردەوە

ئاڤا نیوز

جارێکی دیکە ئێران دەستی بە هێرشی مووشەکی کردەوە بۆ سەر شارەکانی ئیسرائیل و ژمارەیەک برینداری لێ کەوتووەتەوە. لە ئێوارەی ئەمڕۆوە ئەمە دووەم هێرشی مووشەکییە بۆ سەر ئیسرائیل و ئێوارە نزیکەی 70 مووشەکی ئاراستەی ئەو وڵاتە کرد، ئەمەش دوای بۆردوومانی قورسی ئیسرائیل هات بۆ سەر شارەکانی ئێران.

وێنە گەورەکە: جەنگی ئیسرائیل و ئێران کە سێ ڕۆژە بە دەستپێشخەری ئیسرائیل سەریهەڵداوە تاوەکو ئێستا بەقورسی بەردەوامە. هەرچەندە چەندین وڵات لە هەوڵدان کۆتایی بە جەنگەکە بهێنرێت، بەڵام تاوەکو ئێستا هەوڵەکان بێ ئەنجام بوون و مەترسی هەیە شەڕەکە زیاتر فراوان بێت و پەل بکێشێت بۆ جەنگێکی هەرێمی.

ئەوەی ئیستا ڕوودەدات: نزیکەی کاتژمێر 09:00ـی ئەمشەو ئێران جارێکی دیکە دەستی بە هێرشی مووشەکی کردەوە بۆ سەر ئیسرائیل، هەرچەندە سیستەمی بەرگریی ئیسرائیل بەرپەرچی مووشەکەکان دەداتەوە، بەڵام ناتوانن هەموویان بخەنە خوارەوە و بەشێکیان ئامانجەکەیان دەپێکن. میدیاکان ئاماژە بەوە دەکەن لە شارەکانی تەلئەبیب و حەیفا و قودس مووشەک کەوتوونەتە خوارەوە و ژمارەیەک برینداریان لێ کەوتووەتەوە، تاوەکو ئێستاش بەهۆی هێرشەکەی ئەمشەو کوژرانی هیچ کەسێک ڕانەگەیێنراوە.

٠ میدیای ئێران داوا لە دانیشتووانی فەلەستین دەکات دوور بکەونەوە لە دامەزراوە ئەتۆمییەکان و دامەزراوەکانی وزە و ناوەندەکانی لێکۆڵینەوەی تیشکی و هەر شوێنێک کە ماددەی تیشکدەری تێدابێت، ئەمەش لە پێناو سەلامەتیان و بۆ دوورکەوتنەوەیە لە هەر مەترسییەک.

٠ میدیاکانی ئێران لەزاری بەرپرسانی سەربازی بڵاویان کردەوە، مووشەکەکانی ئێران کۆمپانیای پیشەسازی سەربازی ئیسرائیلیان لە حەیفا  و شوێنی نیشتەجێبوونی سەرکردە و زاناکانیان کردووەتە ئامانج.

٠ میدیاکانی ئێران دەڵێن ئەو مووشەکانەی ئەمشەو ئاراستەی ئیسرائیل کراون بۆ یەکەمجارە بەکاردەهێنرێن. 

٠ وتەبێژی سوپای پاسداران بە میدیاکانی ئێرانی ڕاگەیاندووە: "چەند خاڵێكمان لە ئیسرائیل دیاریكردووە بۆ بەئامانجگرتنی، بەپێی میدیا عەرەبییەکانیش، دەنگی چەند تەقینەوەیەك لە شاری قودس (ئۆرشەلیم) دەبیسترێت".

٠ ڕۆژنامەی یەدیعۆت ئەحرۆنۆت: مووشەکێک بە شێوەیەکی ڕاستەوخۆ لەسەر باڵەخانەیەک لە باکووری ئیسرائیل کەوتە خوارەوە. ئامادەکاری بۆ هەڵدانی مووشەکی نوێش لە ماوەی چەند خولەکی داهاتوودا دەکرێت.

٠ مەسعود پزیشکیان، سەرۆککۆماری ئێران دەڵێت، "ئێمە شەڕمان دەستپێنەکرد، بەڵام بە تووندی وەڵاممان دایەوە، ئەگەر دەستدرێژییەکان بەردەوام بن، وەڵامەکانمان بۆ دەستدرێژیکاران ئازاربەخشتر دەبن"

٠ میدیاکانی ئیسرائیل: مووشەکێک بەر شارۆچکەی موشاف لە نزیک کیریات گات کەوتووە. میدیای ئێرانیش دەڵێت، "کۆمپانیای "ڕافائێل"ـی سەربازی کراوەتە ئامانج و بەتەواوەتی تێکشکێندراوە".

٠ کەناڵی جەزیرە لەسەر زاری دەسەڵاتی ئاگرکوژێنەوە و فریاگوزاری ئیسرائیل بڵاوی کردووەتەوە: لە ناوچەی کەنار دەریا ڕاستەوخۆ مووشەک بەر دوو خانوو کەوتووە، لە باشووریش مووشەکێک بەر باڵەخانەیەکی نیشتەجێبوون کەوتووە.

٠ ئاژانسی تەنسیمی ئێران دەڵێت: ئێران بە مووشەک هێرشی کردووەتەوە سەر فڕۆکەخانەی بنگۆریۆن لە تەلئەبیب و ڤیدیۆکەی بڵاوکردووەتەوە، بەڵام تاوەکو ئێستا ئیسرائیل پشتڕاستی نەکردووەتەوە.

٠ ڕادیۆی ئیسرائیل بڵاوی کردووەتەوە کە ئێران ناوچەی نیشتەجێبوونی خەڵکی مەدەنی بۆردوومان دەکات. 


باکگراوند: بەهۆی هێرشی سێ ڕۆژەی ئیسرائیل بۆ سەر ئێران تاوەکو ئێوارەی ئەمڕۆ کوژرانی زیاتر لە 128 کەس و برینداربوونی زیاتر لە 900 کەس ڕاگەیێنرابوو. ژمارەی کوژراوانی ئیسرائیلیش بەهۆی مووشەکەکانی ئێران گەیشتبووە 13 کەس لەگەڵ برینداربوونی 380  کەس. ژمارەی کوژراو و بریندارانیش بەردەوام لە زیادبوونە.