بەرپرسێکی ئێرانی: جەنگ هەفتەکانی داهاتووش بەردەوام دەبێت

ئاڤا نیوز

بەرپرسێکی ئێرانی دەڵێت، ئیسرائیل بە نیازبوو وەک ڕۆژی یەکەمی هێرشەکانی لە ڕۆژی دووەمیش فەرماندە سەربازی و زانا ئەتۆمییەکانمان تیرۆر بکات، بەڵام بەهۆی هێرشە بەرامبەر و یەک لەدوای یەکەکانی ئێمەوە، دەرفەتی ئەنجامدانی ئەم ئۆپەراسیۆنەی نەبوو. هۆشداریش دەدات کە ئەم جەنگە هەفتەیەک زیاتر بەردەوام دەبێت.

وێنە گەورەکە: جەنگی نێوان ئیسرائیل و ئێران تا ئێستا بەردەوامە و هەردوولا زیانی زۆریان بەرکەوتووە، وڵاتان داوا دەکەن کە دان بەخۆیان دا بگرن کۆتایی بەم جەنگە بهێنن، بەڵام بەرپرسێکی ئێرانی هۆشداری لە درێژەکێشانی جەنگەکە دەدات.

لێدوانی فەرمی: موحسین ڕەزایی، ئەندامی کۆمەڵەی دەستنیشانکردنی بەرژەوەندییەکانی ئێران ڕایگەیاند: ئیسرائیلییەکان پلانێکی چەند قۆناغییان هەبوو کە قۆناغی یەکەمی، تیرۆرکردن و هێرشکردنە سەر زانا ئەتۆمییەکانمان بوو. بڕیار بوو بەرەبەیانی ڕۆژی شەممەش کۆمەڵێکی دیکەغ کەسەکانمان لە ئێران تیرۆر بکات، بەڵام بەهۆی هێرشە بەرامبەر و یەک لەدوای یەکەکانی ئێمەوە، دەرفەتی  ئەمەی نەبوو.

ڕەزایی ئەمانەشی وت:

٠ ئێمە هێشتا جەخت لەسەر خۆبەدوورگرتن لە دەستگەیشتن بە چەکی ئەتۆمی دەکەینەوە و پابەندی فەتواکەی ڕێبەری باڵا دەبین.

٠ هەرچەندە ناتوانرێت داهاتوو بە وردی پێشبینی بکرێت، بەڵام لە ئێستادا هیچ پلانێک بۆ هەنگاونان بەرەو بۆمبی ئەتۆم لە ئارادا نییە.

زانیاریی زیاتر: ڕەزایی وتیشی، ئێمەش هەنگاوی بەرامبەرمان نا کە بەمزووانە ڕوون دەبێتەوە، بۆیە ئەم جەنگە هێشتا بەردەوامە و لە هەفتەکانی داهاتووشدا بەردەوام دەبێت.