ئەردۆغان بۆ پزیشکیان: پێویستە دەستبەجێ کۆتایی بەم شەڕە بهێنرێت

ئاڤا نیوز

ڕەجەب تەیب ئەردۆغان، سەرۆککۆماری تورکیا، پەیوەندییەکی تەلەفۆنی لەگەڵ مەسعوود پزیشکییان، سەرۆککۆماری ئێران ئەنجامدا و بە پزیشکیانی گوت کە پێویستە دەستبەجێ کۆتایی بەم شەڕە بێت، هەروەها ئامادەیی وڵاتەکەی بۆ هەموو جۆرە ڕۆڵێک نیشاندا، کە کۆتایی بەم شەڕ و گرژییە بێنێت و دۆخەکە بگۆڕێت بۆ ڕێککەوتنی دیپلۆماسی لەسەر پرسی وزەی ئەتۆم.

وێنە گەورەکە: لە دەستپێکی شەڕی نێوان ئێران و ئیسرائیل کە ماوەی چوار ڕۆژە بەردەوامە، ئەردۆغان دووەم جارە بە تەلەفۆن قسە لەگەڵ پزیشیکییان دەکات، هەردوو جارەکەش جەختی لە کۆتایی هێنان بەو شەڕە و ڕێککەوتنی وزەی ئەتۆم کردووە.

ڕاگەیێنراوی فەرمی: سەرۆکایەتی کۆماری تورکیا ڕایگەیاند، ڕەجەب تەیب ئەردۆغان، سەرۆککۆماری تورکیا، پەیوەندییەکی تەلەفۆنی لەگەڵ پزیشکییان ئەنجامداوە، هەردوولا شەڕی نێوان ئێران و ئیسرائیل و کاریگەرییەکانی لەسەر ڕۆژهەڵاتی ناوەڕاست باس کردووە.  ئەردۆغان بە پزیشکییانی گوتووە: پێویستە ئەم شەڕە دەستبەجێ کۆتایی بێت، تورکیا ئامادەیە هەموو جۆرە ڕۆڵێک بگێڕێت بۆ ئاسانکاری لە ڕێککەوتنی وزەی ئەتۆم.

لەلایەکی دیکەوە: سەرۆککۆماری تورکیا، جەختی لەوە کردەوە کە تورکیا گرنگی بە پاراستنی سەقامگیری و ئاسایشی ناوچەکە دەدات.