ئێران نەرمیی دەنوێنێت لە دانوستاندنەکانی لەگەڵ ئەمریکا

ئاڤا نیوز

 

لەگەڵ دەستپێکی جەنگی نێوان ئیسرائیل و ئێران، گەڕی شەشەمی دانوستاندنە ناڕاستەوخۆکانی نێوان ئێران و ئەمریکاش لەلایەن تارانەوە وەستێنرا، ئەمەش بەبیانووی ئەوەی کە واشنتن پشتیوانی لە هێرشەکانی ئەلئەبیب دەکات بۆ سەر تاران.

 

چیڕۆکی سەرەکی: دوای یەک مانگ لە هەڕەشەکانی ئیسرائیل بۆ سەر ئێران دواجار ئیسرائیل هێرشە بەرفروانەکەی بۆ سەر ئێران دەستپێکرد و ‌هێرشێکی فراوانی بۆ سەر خاکی ئێران لەلایەن ئیسرائیلەوە ئەنجامدرا، دواتر و دەستبەجێی ئێران وەڵامی هێرشەکانی دایەوە و تاوەکو ئێستا هێرشەکانی هەردوولا بۆ سەر یەکتری بەردەوامن.

 

چی ڕوودەدات: بڕیار وابوو ڕۆژی یەکشەممە 15-6-2025، شەشەم گەڕی دانوستانە ناڕاستەوخۆکانی نێوان ئەمریکا و ئێران بە نێوەندگیری عومان بەڕێوەبچێت، بەڵام بەهۆی ئەم پێشهاتەی ئێستا دروستبووە چارەنووسی ئەو دانوستانە دیار نییە، ئەمریکاش لای خۆیەوە ئامادەیە لەگەڵ ئێران دابنیشێت. ئێستا و دوای قووڵبوونەوەی ڕووبەڕووبوونەوەکان ئێران دەیەوێت بگەڕێتەوە سەر مێزی گفتوگۆ. 

 

لێدوانی فەرمی: دوو سەرچاوەی ئێرانی و سێ سەرچاوەی هەرێمی بە ئاژانسی هەواڵی ڕۆیتەرزیان ڕاگەیاندووە کە ئێران لە دانوستاندنەکانی لەگەڵ ئەمریکا لەبارەی بەرنامە ئەتۆمییەکەی نەرمی دەنوێنێ.

 

- ئەو سەرچاوەیە باسی لەوەشکردووە کە ئێران داوای لە سعودییە، قەتەر و عومان کردووە، داوا لە دۆناڵد ترەمپ، سەرۆکی ئەمریکا بکەن گوشار لە ئیسرائیل بکات بۆ ڕاگرتنی شەڕ، بەو مەرجە نەرمی دەنوێنێ لە دانوستاندنەکانی لەبارەی بەرنامە ئەتۆمییەکەی.