هێرشی نوێی مووشەکی ئێران بۆ سەر ئیسرائیل

ئاڤا نیوز

 

جارێکی دیکە کۆماری ئیسلامیی ئێران هێرشێکی نوێی مووشەکی کردە سەر ئیسرائیل و سیستەمی بەرگری ئەو وڵاتەش بەشێکی مووشەکەکانی خستەخوارەوە.

 

وێنە گەورەکە: ئێران و ئیسرائیل شەوی سێشەممە و بەرەبەیانیی چوارشەممە، بەردەوام بوون لە مووشەکبارانکردنی یەکتر، لەو جەنگە مێژووییەیاندا کە ترسی ئەوەی دروست کردووە ئاگرەکەی رۆژهەڵاتی ناوەڕاست بگرێتەوە.

 

 

راگەیەندراوی فەرمی: سوپای پاسداران رایگەیاند بۆ یەکەمجار مووشەکی هایپەرسۆنیکی جۆری فەتاح 1 ـی ئاراستەی ئیسرائیل کردووە، کە زیانی بە ئیسرائیل گەیاندووە. لەبەرامبەردا ئیسرائیل دەڵێ لە شەشەم رۆژی شەڕەکەدا، چەند شوێنێکی سەربازیی لە ئێران کردووەتە ئامانج.

 

ئەمەش بزانە: دۆناڵد ترەمپ، سەرۆکی ئەمریکا، دوێنێ داوای "خۆبەدەستەوەدانی بێمەرج"ـی لە تاران کرد. سەرکردەکانی G7 لەنێویشیاندا ترەمپ رۆژی دووشەممە داوای راگرتنی شەڕیان کرد، بەڵام هەموویان رەخنەیان لە تاران گرت و پشتگیریی ئیسرائیلیان کرد. ئەوان دەڵێن " ئیسرائیل بەرگری لە خۆی دەکات."

 

 

لە لایەکی دیکەوە: چین ترەمپی تۆمەتبار کرد بەوەی "بەنزین بە ئاگری شەڕەکەدا دەکات". رەجەب تەیب ئەردۆغان، سەرۆکی تورکیاش بنیامین نەتەنیاهوو، سەرۆکوەزیرانی ئیسرائیلی تۆمەتبار کرد بەوەی گەورەترین هەڕەشەیە لەسەر ناوچەکە.

 
زانیاریی زیاتر: سوپای ئیسرائیل شەوی رابردوو و بەرەبەیانیی ئەمڕۆ، لە زۆر ناوچەی وڵاتەکە زەنگی ئاگادارکردنەوەی مەترسیی لێدا، لەنێویاندا لە شارۆچکەی دیمۆنا کە دەکەوێتە باشووری ئیسرائیل و وێستگەی ئەتۆمیی لێیە، بەڵام هیچ راپۆرتێک لەبارەی ئەوەی مووشەکی بەرکەوتبێت، نییە.

 

ئاماری فەرمی: هەتاوەکو رۆژی یەکشەممە هێرشەکانی ئیسرائیل بۆ سەر ئێران بوونەتە هۆی کوشتنی بەلایەنی کەمەوە 224 کەس و برینداربوونی 1200 کەسی دیکە، لەنێویاندا ژمارەیەک فەرماندەی باڵای سوپا و زانای ئەتۆمی هەبوون، ئەمە بەپێی وەزارەتی تەندروستی.  بەپێی نووسینگەی نەتەنیاهوو؛ هێرشەکانی ئێرانیش بۆ سەر ئیسرائیل، بوونەتە هۆی کوژرانی 24 کەس و برینداربوونی 592 کەسی دیکە لە ئیسرائیل.