جەنگی نێوان ئیسرائیل و ئێران کاردانەوەی جیاوازی لێدەکەوێتەوە

ئاڤا نیوز

جەنگی نێوان ئیسرائیل و ئێران لە شەشەم ڕۆژیدا بەردەوامە و بەهۆیەوە کاردانەوەی جیاوازی وڵاتانی لێکەوتووەتەوە و زۆرینەیان دابەشبوون بەسەر دوو بەرەی جیاوازدا و هەندێکی دیکەش بێلایەنییان هەڵبژاردووە. 

 

چیرۆکی سەرەکی: جەنگی نێوان ئیسرائیل  و ئێران پێی ناوەتە شەشەم ڕۆژی، تاوەکو ئێستا هەردوولا چەندین هێرشیان کردووەتەوە سەر ناوەند و پێگە ستراتیژییەکانیان و بە نوێترین تەکنەلۆژیای سەربازیی سەردەم ڕووبەڕووی یەکتربوونەتەوە. لەمبارەیەوە کۆمەڵێک زانیاری و پێشهاتی نوێ هەن.

دوایین پێشهاتەکان لەبارەی جەنگەکە:

- سەرۆکی زۆرینەی کۆمارییەکان لە ئەنجوومەنی پیرانی ئەمریکا: نامانەوێت بچینە ململانێوە، بەڵام ئەوەش پەیوەندی بەوەوە هەیە کە ئێران تا چەند دەگەڕێتەوە بۆ گفتوگۆ.

- بەرپرسانی ئەمریکا بۆ ڕۆژنامەی 'وۆڵ ستریت جۆرناڵ': لە کۆبوونەوەکەی ترەمپ و ئەنجوومەنی ئاسایشی نەتەوەیی ئەمریکادا هیچ بڕیارێکی کۆتایی لەبارەی ئێرانەوە نەدرا.

- میدیای ئیسرائیل: لەسەرەتای هێرشەکانی ئێرانەوە 24 هاووڵاتی کوژراون و هەزار و 300ی دیکەش برینداربوون.

- میدیای ئیسرائیل: لە شەش ڕۆژدا ئێران 440 مووشەکی ئاراستەی ئیسرائیل کردووە.

- قائیمقامی شاری ورامین لە باشووری ڕۆژهەڵاتی تاران: بەرگریی ئاسمانی وڵاتەکەمان فڕۆکەیەکی ئێف 35ی ئیسرائیلی لە ناوچەی جەواد ئاباد خستەخوارەوە.

- وەزارەتی تەندروستی ئیسرائیل دەڵێت، بەهۆی هێرشەکانی شەوی ڕابردووی ئێرانەوە، 94 بریندار گەیێنراونەتە نەخۆشخانەکانی ئیسرائیل.

- ئاژانسی مهر دەڵێت، هێزە ئەمنییەکانی وڵاتەکەی لە ناوچەیەکی نیشتەجێ بوونی تاران، شکستیان بە ئۆپەراسیۆنێکی پەیوەست بە مۆساد هێناوە.

- لە شاری ری باشووری تاران شەڕ و پێکدادان لەنێوان هێزە ئەمنییەکان و ژمارەیەک کەس ڕوویدا کە بە سیخوڕی دەزگای هەواڵگریی مۆسادی ئیسرائیلی تۆمەتبارکراون، بەگوێرەی ئاژانسی مێهریش پێنج کەسیان دەستگیرکراون.

- ئێران جارێکی دیکە ڕاگرتنی گەشتە ئاسمانییەکانی درێژکردەوە.

- کەناڵی ئەی بی سی ئەمریکی لە سەرچاوەیەکی حکومەتی وڵاتەکەیەوە: دۆناڵد ترەمپ سەرۆکی ئەمریکا نائومێد بووە بەهۆی ئەوەی ئێران دەستبەجێ وەڵامی داواکارییەکەی نەداوەتەوە، داواکارییەکەی ترەمپ بریتی بوو لەوەی ئێران بێ مەرج خۆ ڕادەست بکات.

- وەزارەتی دەرەوەی ڕووسیا: هەڕەشەی ئەتۆمی لە ڕۆژهەڵاتی ناوەڕاست ڕەهەندێکی واقیعی هەیە و هەڕەشەیە لەسەر ناوچەکە و جیهانیش.

- بەرپرسانی ئەمریکا بۆ ڕۆژنامەی 'وۆڵ ستریت جۆرناڵ': ئیسرائیل لە مووشەکی بەرگریY ئاسمانیدا کێشەی بۆ دروستبووە.

- هێزەکانی ئێران: لە ناوچە جیاوازەکان ڕووبەڕووی 14 هێرشی درۆنیی بووینەتەوە.

- هێزەکانی ئێران: لە چەند ناوچەیەکدا ناوەندی دروستکردنی درۆنمان دۆزیووەتەوە.

- میدیای ئیسرائیل: تەنیا خەرجی ڕۆژانەی سیستمی بەرگریی ئاسمانی ئیسرائیل ڕۆژانە دەگاتە 285 ملیۆن دۆلار.