ئێران دەڵێ عێراق دەستی بەسەر چەندین درۆندا گرتووە

ئاڤا نیوز 

 

پۆلیسی ئێران رایگەیاند، عێراق ڕۆڵی هەبووە لە ئاشکراکردنی ئەو بارهەڵگرانەی، لە ناوچەکانی سنووری نێوان ئەو دوو وڵاتە درۆنیان هەڵگرتووە.

 

ڕاگەیەنراوی فەرمی: سەعید مونتەزەر مەهدی، گوتەبێژی پۆلیسی ئێران ئەمڕۆ رایگەیاند، لە 24 کاتژمێری ڕابردوودا، 14 درۆنیان لە سەرتاسەری وڵات خستووەتەخوارەوە.

 

چەندین کارگەی دروستکردنی کەلوپەلی درۆن و فڕۆکەی چوار باڵی (کۆدا کۆپتەر) و بۆمبیش لە پارێزگاکانی تاران و ئەلبورز لە ئۆپەراسیۆنی جیاوازدا دۆزراونەتەوە.

 

هاوکات وەک بەرپرسە ئێرانییەکە دەڵێ: سێ بارهەڵگر درۆنیان لە تاران و ئەلبورز دۆزیوەتەوە، کە فڕۆکەی بێفڕۆکەوان و مادەی تەقەمەنیان هەڵگرتبوو. 

 

ئەوەی پەیوەندیی بە عێراقەوە هەیە: عەمید مونتەزەر مەهدی دەڵێ لە چوارچێوەی مامەڵە و دیپلۆماسیەتی سنووری لەنێوان ئێران و عێراق، عێراق لە هەنگاوێکی خێرادا دەستی بەسەر سێ بارهەڵگردا گرت کە درۆنیان هەڵگرتبوو.

 

ئەمە لەکاتێکدایە: عێراق هیچ زانیارییەکی لەبارەی ئەو درۆنانە و ئۆپەراسیۆنەکە بڵاونەکردووەتەوە.

 

ئەوەی پێویستە بیزانی: ماوەی شەش رۆژە ئێران و ئیسرائیل لە جەنگێکی سەختدان، ئەمەش دوای ئەوەی ئیسرائیل هێرشی کردە سەر ژێرخانی چەکی ئەتۆمی و بەرپرسە باڵا سەربازییەکانی ئێران و زانا ئەتۆمییەکانی بەئامانج کرد. راپۆرتەکان باس لەوە دەکەن، بەشێک لەو هێرشانەی بە درۆن کراون، لە خاکی ئێرانەوە هەڵدراون.