هۆشدارییەک لە كۆریای باكوورەوە بۆ ئەمریکا و ئەوروپا؛ ئاگری جەنگ خۆش نەکەن

ئاڤا نیوز

لە بەردەوامبوونی شەڕی نێوان ئێران و ئیسرائیل، وەزارەتی دەرەوەی کۆریای باکوور هۆشداری دەداتە ئه‌مریكا و وڵاتانی ئه‌وروپا كه‌ ئاگری ئه‌م جەنگە خۆش نه‌كه‌ن.

وێنە گەورەکە: ماوەی حەوت ڕۆژە جەنگی نێوان ئیسرائیل و ئێران بەردەوامە و هەوڵە ناوچەیی و نێودەوڵەتییەکان بۆ ڕاگرتنی جەنگەکە بەردەوامە، کۆریای باکووریش بۆ یەکەمجار هاتە دەنگ و داوا دەکات جەنگەکە فراوان نەبێت.

ڕاگەیێنراوی فەرمی: وه‌زاره‌تی ده‌ره‌وه‌ی كۆریای باكوور هێرشه‌كانی ئیسرائیل بۆ سه‌ر ئێران به‌ تووندی سه‌ركۆنه‌ دەکات و ڕایگەیاند،'' ئه‌و هێرشانه‌ بوونه‌ته‌ هۆی كوژرانی هاووڵاتییانی مه‌ده‌نی و تاوانێكه‌ دژی مرۆڤایه‌تی و لێخوشبوونیان بۆ نییه، هاوکات ئیسرائیل له‌ لایه‌ن ئه‌مریكا و ڕۆژئاواوه‌ پشتگیریی ده‌كرێت و ئه‌مڕۆ بووه‌ته‌ هه‌ڕه‌شه‌ بۆ سه‌ر ئاسایش و ئاشتیی ڕۆژهه‌ڵاتی ناوه‌ڕاست و جیهان به‌گشتی دۆخی ڕۆژهەڵاتی ناوەڕاست بەرەو قۆناغێکی کارەساتبار دەبات".

ئەوەی پێویستە بیزانیت: ئەمریکا سەرەڕای پشتگیرییکردنی ئۆپەراسیۆنەکانی ئیسرائیل دژ بە ئێران، بەڵام تاوەکو ئێستا بەفەرمی بەشداری هێرشکردنە سەر ئێران نەکردووە،

زانیاریی زیاتر: ڕۆژنامه‌ی فاینناشال تایمز بڵاویكرده‌وه‌، كییه‌ر ستارمه‌ر، سه‌رۆكوه‌زیرانی به‌ریتانیا حكومه‌ته‌كه‌ی ئاگادار كردووه‌ته‌وه‌‌ بۆ ئه‌گه‌ری هێرشی ئه‌مریكا لە دژی ئێران له‌ ئاماده‌باشیدا بێت.

باکگراوند: ڕۆژی هەینی ڕابردوو 2025-06-13، هێزەکانی ئیسرائیل بە فڕۆکەی جەنگی و درۆنەوە، هێرشیان کردە سەر ئێران و بۆردوومانی دامەزراوە ئەتۆمییەکان، کارگەکانی دروستکردنی مووشەکی بالیستیکی کرد و ژمارەیەک لە سەرکردەی سەربازی باڵا و زانایانی ئەتۆمیی وڵاتەکەی بەئامانج گرت لەهەمان ڕۆژ ئێران وەڵامی دایەوە تاوەکو ئێستا هێرشەکان بەردەوامن.