ئێران سکاڵا لەسەر سەرۆکی ئاژانسی نێودەوڵەتیی وزەی ئەتۆم تۆمار دەکات

ئاڤا نیوز

ئێران سکاڵا لەسەر سەرۆکی ئاژانسی نێودەوڵەتیی وزەی ئەتۆم تۆمار دەکات و تۆمەتباری دەکات بەوەی لێدوانی ناڕاستی بڵاوکردووەتەوە لەبەرژەوەندی ئیسرائیل. 

وێنە گەورەکە: زیاتر لە هەفتەیە جەنگی نێوان ئیسرائیل و ئێران سەریهەڵداوە و هەردوولا بە چەندین شێواز ڕووبەڕووی یەکتری بوونەتەوە و دیار نییە ئاگری ئەو شەڕە کەی دەکوژێتەوە؛ ئیسرائیل هەڕەشەی لەناوبردنی ژێرخانی ئەتۆمی ئێران دەکات و لەبەرامبەردا ئێران دەڵێت ئیسرائیل دەسووتێنم. 

زانیاریی زیاتر: ڕۆژێک بەر لە هێرشی ئیسرائیل بۆ سەر ئێران، ئاژانسی وزەی ئەتۆمی لە ڕاپۆرتێکدا کە پشتی بە لێدوان و شیکردنەوەی رافائيل گرۆسی، سەرۆکی ئاژانسی نێودەوڵەتیی وزەی ئەتۆم بەستبوو، چەند زانیارییەکی لەبارەی چالاکییەکانی ئێران لە پەرەپێدانی وزەی ئەتۆم بڵاوکردبووە و دەڵێت: ماوەیەکی زۆرە ئەو وڵاتە پەیوەستە بە پڕۆگرامی ئەتۆمییەوە و هەموو پابەندییەکانی فەرامۆش کردووە. 

٠ ئیسرائیل دوای بڵاوبوونەوەی ئەم ڕاپۆرتە دەستی بە چالاکی کرد و هێرشی بەرفراوانی بۆ سەر ئێران دەستپێکرد کە بووە هۆی هەڵگیرسانی جەنگ. 

ڕاگەیێنراوی فەرمی: ئەمیر سەعید ئیروانی، نوێنەری ئێران لە ڕێکخراوی نەتەوە یەکگرتووەکان ڕایگەیاند: تاران سکاڵایەکی فەرمی لە ئەنجوومەنی ئاسایشی نێودەوڵەتیی و نەتەوە یەکگرتووەکان لەسەر سەرۆکی ئاژانسی نێودەوڵەتیی وزەی ئەتۆم تۆمار کردووە، ئەمەش بەهۆی هەڵوێستەکان سەبارەت بە چالاکییە ئەتۆمییەکان. 

- نوێنەری ئێران باسی لەوەشكردووە، گرۆسی سەرکۆنەی هێرشەکانی ئیسرائیلی نەکردووە و وەکو هاوبەشێک دەردەکەوێت لە شەڕی ئیسرائیل دژ بە ئێران.