چوارچێوەی هەماهەنگی بۆ ئاڤا: بڕیاری گۆڕینی مالیكی نەدراوە و لەگەڵ ئیدارەی ترەمپ دانوستان دەکەین

ئاڤا نیوز

وتەبێژی ئەنجوومەنی باڵای ئیسلامی عێراق کە یەکێکە لە لایەنەکانی ناو چوارچێوەی هەماهەنگی بە ئاڤا میدیای ڕاگەیاند: بەدروستی نازانین بەهۆی 'میزاجی دەرەکییەوە' بڕیاری گۆڕینی نووری مالیکی بدرێت، بۆیە بۆ ڕەواندنەوەی نیگەرانییەکانی واشنتن، کاری لە پێشینەیان گفتوگۆ و دانوستان لەگەڵ ئیدارەی ترەمپ دەبێت. 

لێدوانی فەرمی: عەلی ئەلدفاعی، وتەبێژی ئەنجوومەنی باڵای ئیسلامی عێراق ئەمڕۆ پێنجشەممە بە ئاڤا میدیای ڕاگەیاند: چوارچێوەی هەماهەنگی کە گەورەترین فراکسیۆنی پەرلەمانە گەلی عێراق هەڵیبژاردووە، بۆیەش مافی دیاریکردنی سەرۆکوەزیرانی هەیە. "تائێستاش بڕیاری گۆڕینی کاندیدەکەمان نەداوە کە نوری مالیکییە، بەڵام ئەگەر لە بڕیاری کاندیدکردنی مالیکیش پاشکەشە بکەین، بەبڕیاری نیشتیمانیی خۆمان پاشەکشە دەکەین".

ئەلدفاعی، وتیشی، "تائێستا قورسە بەهۆی تایبەتمەندی بیرکردنەوەی گەلی عێراق و لایەنە سیاسییەکان بڕیاری گۆڕینی کاندیدەکەمان بدەین، بۆیەش هەوڵ دەدەین دەرگای گفتوگۆ و دانوستان لەگەڵ ئیدارەی ترەمپ لەسەر ئەم بابەتە بکەینەوە.

٠ بەهۆی ئەوەی ئیدارەکانی ئەمریکا پراگماتیین (مامەڵە لەگەڵ واقیع دەکەن) و لەسەر بنەمای بەرژەوەندییەکانی وڵاتەکەشیان مامەڵە و سیاسەت دەکەن.

زانیاریی زیاتر: لەبارەی ماوە دەستوورییەکانیش بۆ هەڵبژاردنی سەرۆککۆمار و ڕاسپاردنی سەرۆکوەزیران، وتەبێژی ئەنجوومەنی باڵای ئیسلامی دڵنیاییدا بە تەواوی پابەندی ئەو وادە دەستووریانە دەبن. دەشڵێت: "ئومێدەوارین یەکشەممەی داهاتوو کورد لەسەر یەک کاندیدی هاوبەش بۆ پۆستی سەرۆککۆمار ڕێکبکەوێت و سەرۆککۆمار هەڵبژێردرێت، دواتریش 15 ڕۆژی ماوەی ڕاسپاردن و 30 ڕۆژی ماوەی ڕاسپاردنی کاندیدی سەرۆکوەزیران و پێکهێنانی حکومەت دەمێنێت، ئەو ماوەیەش کاتێکی باشە کە چوارچێوە کۆتا بڕیاری خۆی لەسەر بەردەوامبوون یانیش گۆڕینی کاندیدەکەی بدات."