ئامۆزایەکی بەشار ئەسەد کە بازرگانێکی گەورەی ماددە هۆشبەرە دەستگیر کرا

ئاڤا نیوز

لە ئۆپەراسیۆنێکی ئەمنیی ورد و تۆکمەدا، دەزگای هەواڵگریی گشتیی سووریا بە هاوکاریی لایەنە پەیوەندیدارەکانی وەزارەتی ناوخۆ، توانیان تاوانبار وەسیم ئەسەد دەستگیر بکەن، کە بە یەکێک لە دیارترین بازرگانانی ماددە هۆشبەرەکان و تێوەگلاو لە چەندین تاوانی جۆراوجۆردا دادەنرێت.

 

وێنە گەورەکە: لە سەردەمی دەسەڵاتی بەشار ئەسەد، سووریا ببوو بە ناوەندی بەرهەمهێنانی حەبی کەپتاگۆن و لەوێوە ڕەوانەی وڵاتانی دیکەی عەرەبی دەکرا، لەم بوارەشدا حکومەت بە کارئاسانیکردن بۆ بەرهەمهێنانی ئەو ماددە هۆشبەرە تۆمەتبار دەکرا.

 

ڕاگەیێنراوی فەرمی: بەگوێرەی وەزارەتی ناوخۆی سووریا، ئۆپەراسیۆنی دەستگیرکردنەکە لە ڕێگەی بۆسەیەکی تۆکمەوە ئەنجامدراوە، کە لەلایەن یەکێک لە تیمەکانی بەڕێوەبەرایەتیی ئەرکە تایبەتەکانی سەر بە وەزارەتی ناوخۆوە جێبەجێ کرا و سەرکەوتووانە کۆتایی هات.

 

وەسیم ئەسەد کێیە؟

٠ وسیم بەدیع ئەسەد، ئامۆزای بەشار ئەسەدی سەرۆکی پێشووی سووریایە و بە یەکێک لە دیارترین سەرکردەکانی میلیشیاکانی "شەبیحە" و گەورەترین بازرگانانی ماددەی هۆشبەری "کاپتاگۆن" لە ناوچەکەدا ناسراوە.

٠ ناوی بەردەوام لەگەڵ تۆڕەکانی قاچاخچێتی، دەستبەسەراگرتنی موڵک و ماڵی خەڵک، پارەسەندن و چەندین تاوانی دیکەی ڕێکخراودا لە سووریا و ناوچەکەدا هاتووە.