ئەمریکا: ئێران هێرش بکاتە سەر بنکەکانی ئەمریکا وەڵامێکی وێرانکەرمان دەبێت

ئاڤا نیوز

نوێنەری ئەمریکا لە ئەنجومەنی ئاسایشی نێودەوڵەتیی هەڕەشەی تووند لە ئێران دەکات لە ئەگەری وەڵامی ئێران بۆ هێرشەکانی شەوی ڕابردووی سوپای ئەمریکا بۆ سەر پێگە ئەتۆمییەکانی ئەو وڵاتە.

وێنە گەورەکە: بەرەبەیانی ڕۆژی یەکشەممە، ئەمریکا هێرشی کردە سەر هەر سێ پێگەی سەرەکی ئەتۆمی ئەسفەهان، فۆردۆ و نەتەنز لە ئێران ، ئەمڕۆ لەسەر داوای ئێران ئەنجومەنی ئاسایشی نێودەوڵەتیی بڕیاریدا کۆبوونەوەی نائاسایی خۆی ئەنجام بدات و هێرشی ئەمریکا بۆ سەر ئێران تاوتوێ دەکات.

لێدوانی فەرمی: دۆرەسی شەی، باڵیۆزی ئەمریکا لە ئەنجومەنی ئاسایشی نێودەوڵەتیی لە کۆبوونەوەی نائاسایی ئەمشەوی ئەنجومەنی ئاسایش لە سەر پرسی هێرشی ئەمریکا بۆ سەر ئێران ڕایگەیاند: ئەمریکا لە چوارچێوەی پارێزگاریکردن لە ئیسرائیل هێرشی کردووەتە سەر پێگە ئەتۆمییەکانی ئێران و بەردەوام دەبین لەو پارێزگارییە، گەر ئێران پلانی وەڵامدانەوەی هەبێت و هێرش بکاتە سەر هەر بنکە و بەرژەوەندیەکی ئەمریکا لە رۆژهەڵاتی ناوەڕاست ئەوا وەڵامی ویرانکەرمان بۆ ئێران دەبێت و بە هێزێکی زیاترەوە هێرشیان دەکەینە سەر.