ترەمپ و ستارمەر: لە نزیكترین كاتدا ئێران دەگەڕێنینەوە سەر مێزی گفتوگۆ

ئاڤا نیوز

سەرۆكی ئەمریكا و سەرۆكوەزیرانی بەریتانیا پەیوەندییەكی تەلەفۆنی ئەنجام دەدەن، هەردوولا دووپاتی دەكەنەوە كێشەكانی ئێران لەسەر مێزی گفتوگۆ چارەسەر بكرێن.

وێنە گەورەكە: هێرشە مووشەكییەكانی شەوی ڕابردووی ئەمریكا بۆ سەر دامەزراوە ئەتۆمییەكانی ئێران، كاردانەوەی زۆری جیهانی بەدوای خۆیدا هێنا، ترسی ئەوەی لە كۆمەڵگەی نێودەوڵەتیی دروستكردووە كە جەنگی نێوان ئیسرائیل و ئێران فراوانتر بێت و پریشكی جەنگەکە بەر وڵاتانی دیكەش بكەوێت.

ڕاگەیێنراوی فەرمی: سەرۆكایەتی وەزیرانی بەریتانیا بڵاوی دەكاتەوە، كە دۆناڵد ترەمپ، سەرۆكی ئەمریكا و كیێر ستارمەر، سەرۆكوەزیرانی بەریتانیا لەبارەی پێشهاتە سەربازییەكانی ناوچەی ڕۆژهەڵاتی ناوەڕاست، پەیوەندییەكی تەلەفۆنییان ئەنجامداوە و هەردوولا جەختیان كردووەتەوە لەوەی لە زووترین كاتدا، ئێران بگەڕێننەوە سەر مێزی گفتوگۆ.

هاوكات هەردوو وڵات كۆك بوون لەسەر دۆزینەوەی چارەسەرێكی هەمیشەیی بۆ پرسی ئەتۆمی ئێران.