دوای هێرشکردنە سەر ئێران حووسییەکان بۆ یەکەمجار هێرش دەکەنە سەر ئیسرائیل

ئاڤا نیوز

لە 11 ڕۆژی جەنگی نێوان ئیسرائیل و ئێران، بۆ یەكەمجار مووشەكی حووسییەكانی یەمەن دەگاتە خاكی ئیسرائیل، ئەو پێشهاتەش بۆ دانیشتووانی ئیسرائیل كتوپڕ و پێشبینینەكراو بووە، ئەوەش بە پێی میدیا عەرەبییەكان.

زانیاریی بەدەستهاتوو: بەگوێرەی ڕاپۆرتێكی هەواڵیی كەناڵی ئەلجەزیرە، مووشەكێك دوای ئەوەی لە ناوچەیەكی ئاوەدانیی لە نزیك تەلئەبیب بە تێكشكاوی دەكەوێتە خوارەوە، سەرەتا وا لێكدراوەتەوە كە لە ئێرانەوە ئاڕاستە كراوە، بەڵام دوای لێكۆڵینەوەكان دەركەوتووە، مووشەكەكە لە یەمەنەوە هەڵدراوە، ئەمەش دانیشتووانی تەلئەبیبی ناچاركردووە ڕوو لە ژێرزەمینەكان بكەن.

زانیاریی زیاتر: سەرەڕای ئەوەی حووسییەكانی یەمەن، وەك بەرەیەكی پاڵپشت بۆ ئێران بەردەوام هەڕەشەی بەئامانجگرتنی بەرژەوەندییەكانی ئەمریكا و ئیسرائیل دەكەن، بەتایبەت لەڕێگەی هێرشكردنە سەر ئەو كەشتییە بازرگانییانەی كە لە گەرووی بابولمەندەبەوە ڕەت دەبن، بەڵام پێشبینی ئەوە نەدەكرا ڕاستەوخۆ مووشەك بەرەو ئیسرائیل هەڵبدات، كە سەرەڕای دووری نێوان یەمەن و ئیسرائیل بە زیاتر لە 2000 کیلۆمەتر، سیستەمی دژەمووشەكی ئیسرائیل و گومەزە ئاسنینەكەی لە هەموو كاتێك، كاراترە.

ئەمەش بزانە: گرووپی حووسییەکانی یەمەن، بەگوتەی سەرکردە سەربازییەکانیان، بڕێکی زۆر درۆن و مووشەکیان هەیە، کە لەلایەن دەستەی دروستکردنیی سەربازیی گرووپەکە دروستدەکرێن و پێشدەخرێن، بەڵام دژەکانیان رەتیدەکەنەوە و دەڵێن، "ئێران ئەو مووشەک و درۆنانەیان پێدەدات."