پووتین: هێرشەکانی سەر ئێران بێ پاساون

ئاڤا نیوز 

 

سەرۆکی ڕووسیا ڕایگەیاند ئەوان هەوڵدەدەن هاوکاریی گەلی ئێران بکەن. لەبارەی هێرشەکانی سەر ئێرانیش دەڵێ "بێ پاساو و هۆکارن."

 

وێنە گەورەکە: ڤلادیمیر پووتین، سەرۆکی ڕووسیا لە کۆشکی کریملین پێشوازیی لە عەباس عێراقچی، وەزیری دەرەوەی ئێران کرد. لەو بەشەی کۆبوونەوەکەدا کە بەڕووی میدیاکان کراوەبوو، پووتین باسی لەوە کرد؛ ڕووسیا و ئێران خاوەنی پەیوەندییەکی متمانەپێکراون و "ڕووسیا هەوڵدەدات هاوکاریی گەلی ئێران بکات." 

 

پووتین، هەروەها گوتی ''هێرشەکانی سەر ئێران، بێ پاساو و هۆکارن. لە کاتێکدا وەزارەتی دەرەوەی ڕووسیا هەڵوێستی وڵاتەکەمانی بە ڕوونی دەربڕیوە، هەڵوێستیشمان لە ئەنجوومەنی ئاسایشی نێودەوڵەتی دەزانن".

 

پەیامی فەرمی: عەباس عێراقچی، وەزیری دەرەوەی ئێران باسی لەوە کرد، "ڕووسیا لە بەرەی دروستی مێژوودایە. کردەکانی ئیسرائیل و ئەمریکا بەرامبەر ئێران نایاسایین و ئێران مافی بەرگریکردن لە خۆی هەیە. سوپاسی هاوکارە ڕووسەکانمان دەکەین بۆ سەرکۆنەکردنی ئەو کردەوانە.

 

عێراقچی ئەوەی وەبیرهێنایەوە 'ئێران، لەگەڵ ڕووسیا وێستگەی ئەتۆمیی بووشەهری دروستکردووە' و  ڕایگەیاند: ڕووسیا ڕۆڵی ئەرێنی بینی لەوەی ڕێککەوتنی باشمان هەبێت.

 

ئەوەی پێویستە بیزانی: لەوەتەی ئیسرائیل لە 13ـی ئەم مانگەوە، واتا 11 رۆژ پێش ئێستا دەستی بە هێرشی ئاسمانی کردووە بۆ سەر ئێران، رووسیا بە ئاشکرا راینەگەیاندووە هاوکاریی تاران دەکات. ڤلادیمیر پووتین هەفتەی رابردووش رایگەیاندبوو "ئێران داوای هیچ جۆرە یارمەتییەکی لە رووسیا نەکردووە."

 

لە لایەکی دیکەوە: پێش کۆبوونەوەکەی پووتین و عێراقچی، ئەمڕۆ (دووشەممە) ئاژانسی رۆیتەرز لە زاری سەرچاوەیەکی باڵاوە ئاشکرای کرد: وەزیری دەرەوەی ئێران نامەیەکی عەلی خامنەیی، رێبەری باڵای کۆماری ئیسلامیی ئێران بە ڤلادیمیر پووتین، سەرۆکی رووسیا دەدات کە تێیدا داوای هاوکاری دەکات.