کۆمپانیا نەوتییە جیهانییەکان ژمارەی کارمەندەکانیان لە عێراق کەمدەکەنەوە

ئاڤا نیوز

 

بەهۆی هەڵگیرسانی جەنگی نێوان ئێران و ئیسرائیل و تێکچوونی دۆخی ئەمنیی لە ڕۆژهەڵاتی ناوەڕاست، بەشێک لە کۆمپانیا جیهانییەکان و کۆمپانیاکانی ڕۆژئاوا، ژمارەی کارمەندەکانیان لە ناوچەکە و لە عێراق کەمکردووەتەوە. 

 

وێنە گەورەکە: زیاتر لە هەفتەیەکە جەنگی نێوان ئیسرائیل و ئێران دەستیپێکردووە و هەردوولا بەردەوام هەڕەشەی فراوانکردنی بەرەی جەنگ لە یەکتری دەکەن و ماوەی دوو ڕۆژە بەهۆی بەشداریی ئەمریکا لە جەنگەکە دۆخی ناوچەکە ئاڵۆزبووە، بەهۆی ئەمەشەوە بەشێک لەو کۆمپانیا ڕۆژئاوا و جیهانییانەی لە ناوچەکە کاردەکەن ژمارەی کارمەندانیان کەمکردووەتەوە. 

 

ڕاگەیێنراوی فەرمی: ئەمڕۆ دووشەممە، کۆمپانیای نەوتی بەسرە لە بەیاننامەیەکدا ڕایگەیاند، ژمارەیەک کۆمپانیا دەستیان کردووە بە کەمکردنەوەی کارمەندەکانیان، لەوانە کۆمپانیای (بی پی) بەریتانی لە کێڵگەی رومەیلە ژمارەی کارمەندەکانیان کەم کردوەتەوە، بەڵام کاریگەری نەبووە لەسەر بەرهەمهێنان لە کێڵگەکە.

 

٠ هاوکات کۆمپانیای (ئی ئێن ئای)ـی ئیتاڵی، ژمارەی کارمەندەکانیان لە 260 کارمەندەوە کردووە بە 90  کارمەند، بەڵام کارەکانی ئەو کێڵگەیەش نەوەستاوە.

 

زانیاریی زیاتر: هەرچی سەربارەت بە کۆمپانیا چینییەکانە، کە لە کێڵگەکانی (ڕۆژئاوای قوڕنە یەک و سیبە و فەیحا) کار دەکەن تاوەکو ئێستا کارمەندەکان کاری خۆیان دەکەن و نەکشاونەتەوە.