بەر لە ئاگربەست کوژرانی زانایەکی دیکەی ئەتۆمی ئێران ڕاگەیێنرا

ئاڤا نیوز

بەر لەوەی ئاگربەستی نێوان ئێران و ئیسرائیل بچێتە بواری جێبەجێکردن، ئەم بەرەبەیانە ڕاگەیاندنەکانی ئێران کوژرانی محەممەد ڕەزا سدیقی، زانای بواری ئەتۆمییان ڕاگەیاند.

وێنە گەورەکە: لە ڕۆژی 13-6 ئەو کاتەی هێرشی ئیسرائیل بۆسەر ئێران دەستیپێکرد، ئامانجی سەرەکی ئیسرائیل کوشتن و بە ئامانجگرتنی زانا ئەتۆمییەکان و بەرنامە ئەتۆمییەکەی ئێران و بە ئامانجگرتنی ناوەندەکانی توێژینەوەی بواری ئەتۆمی ئێران بووە.

زانیاری بەدەستهاتوو: بەرەبەیانی ئەمڕۆ سێشەممە، میدیا فەرمییەکانی ئیسرائیل کوژرانی زانایەکی ئەتۆمییان ڕاگەیاند، چەند کاتژمێرێک دواتر میدیای ئێرانی پشتڕاستی زانیارییەکەیان کردەوە. محەممەد ڕەزا سدیقی بەیانی ئەمڕۆ لە هێرشێکی ئیسرائیل کوژرا.

زانیاریی زیاتر: محەممەد ڕەزا سدیقی، لە دایکبووی 24-8-1974ـی ئێرانە، یەکێک لە زانا ئەتۆمییە دیارەکانی ئێران بوو کە لەماوەی ڕابردوودا بەهۆی چالاکییە بەرچاوەکانی لە بواری ئەتۆم، ڕۆژی 2-6-2025  لەلایەن وەزارەتی گەنجینەی ئەمریکا خرا بووە نێو لیستی ئەو کەسانەی سزایان لەسەر دەبێت.

ئەوەی پێویستە بیزانیت: سێ ڕۆژ لەمەوبەر میدیای ئیسرائیلی ڕایگەیاند، تا ئێستا ئیسرائیل 17 زانای ئەتۆمی ئێرانی کوشتووە. بەمجۆرە بێت ئەو ژمارەیەک بەرزتر بووەتەوە، ئەگەرچی هێشتا ئیسرائیل بە فەرمی دواین ئاماری ڕانەگەیاندووە.