میدیای ئێرانی: سزادراوانی زیندانی ئێڤین گواسترانەوە بۆ زیندانی دیکە لە تاران

ئاڤا نیوز

میدیای ئێرانی لە زاری ڕێکخراوی زیندانییانی ئێران بڵاویانکردووەتەوە، دوای بۆردوومانەکەی دوێنێی زیندانەکە، پرۆسەی گواستنەوەی زیندانییان و دابەشکردنیان بەسەر زیندانەکانی دیکەی تاران دەستیپێکردووە و ئەمڕۆ پرۆسەکە کۆتایی هاتووە.

چیرۆکی سەرەکی: لە 11ـهەمین ڕۆژی شەڕی نێوانیان، ئیسرائیل کاتز، وەزیری بەرگری ئیسرائیل ڕایگەیاند، هێرشیان کردووەتە سەر زیندانی ئێڤین لە تاران، دواتر دەرکەوت جگە لە بۆردوومانکردنی دەرگای زیندانەکە زیانێکی زۆریش بەر نەخۆشخانەی زیندانەکە گەیشتووە. هەر زوو هێزە ئەمنییەکانی ئێران ڕایانگەیاند، دۆخی زیندانەکە لەژێر کۆنترۆڵە.

ڕاگەیێنراوی فەرمی: میدیاکانی ئێران لە زاری سەرچاوەیەکی  ڕێکخراوی زیندانییانی ئێران بڵاویانکردەوە، دوێنێ دوای بۆردوومانەکە، پرۆسەی گواستنەوەی زیندانییەکان دەستیپێکردووە، ئەمەش لەپێناو سەلامەتی گیانیان و ئەمڕۆ سێشەممە پرۆسەکە کۆتایی هات. هاوکات هەر زیندانییەکی گواستراوە تەلەفوۆنی بۆ کەسوکارەکەی کردووە و لەو زیندانەی بۆی چووە ئاگاداری کردووەتەوە.

ئەوەی پێویستە بیزانیت: زیندانی ئێڤین دەکەوێتە ناوچەی ئێڤین لە باکووری ڕۆژئاوای تاران. ساڵی 1972 بنیاتنراوە و لەدوای ساڵی 1979ــشەوە لەگەڵ دروستبوونی کۆماری ئیسلامیی ئێران، ڕووبەرەکەی فراوانکراوە. لای ڕێکخراوەکانی کۆمەڵی مەدەنی وەک زیندانێکی خراپ و توند ناوی دەهێنرێت، بەجۆرێک بووەتە شوێنی زیندانیکردنی سیاسییەکان، ڕۆژنامەوانان، کەسانی ئەکادیمیست، چالاکوانانی مافی مرۆڤ و کەسانی بیانی. زیندانەکە شوێنی 15 هەزار زیندانیی دەبێتەوە.