حووسییەکان بەردەوامن لە بۆردوومانکردنی ئیسرائیل

ئاڤا نیوز

گرووپی "ئەنساروڵڵا" لە یەمەن کە بە "حووسییەکان" ناسراون و نزیکن لە ئێران، ڕایگەیاند کە هێرشە سەربازییەکانیان بۆ سەر ئیسرائیل بەردەوام دەبێت، ئەمەش سەرەڕای ڕێککەوتنی تاران و تەلئەبیب لەسەر ڕاگرتنی جەنگی نێوانیان.

وێنە گەورەکە: لە ماوەی 12 ڕۆژی جەنگی ئیسرائیل و ئێران، حووسییەکانی یەمەن چەندین جار ئیسرائیلیان بۆردوومانکرد، لە دوای ڕاگرتنی جەنگی نێوانیان ئەو دوو وڵاتەش حووسییەکان دەڵێن؛ بۆ سەرخستنی غەززە لە هێرشەکانمان بەردەوام دەبین.

ڕاگەیێنراوی فەرمی: محەممەد بەخێتی، کەسێکی دیار و سەرکردەی حووسییەکانە لە تۆڕی "ئێکس" ڕایگەیاندووە: ڕازیبوونی ئەمریکا و قەوارەی زایۆنی لەسەر ئاگربەست لەگەڵ ئێران دووپاتیدەکاتەوە کە ئەوان تەنیا لە زمانی هێزی سەربازی تێدەگەن، ئۆپەراسیۆنە سەربازییەکانمان بۆ  سەر قەوارەی زایۆنی بەردەوام دەبن تاوەکو دەستدرێژی بۆ سەر کەرتی غەززە ڕانەوەستێت و گەمارۆی سەر ئەو کەرتە لانەبرێت. 

 

ئەوەی پێویستە بیزانیت: لە 15ی ئاداری ڕابردوو، بە بڕیاری دۆناڵد ترەمپ، سەرۆکی ئەمریکا هەڵمەتێکی سەربازیی دژی حووسییەکان دەستپێکرد و نزیکەی دوو هەزار بۆمب و مووشەکی ئاڕاستەی پێگەی ئەو گرووپە کرد لە یەمەن کە تێچووەکەی زیاتر بوو لە 775 ملیۆن دۆلارە بە گوێرەی زانیاریی بەرپرسانی ئەمریکا.