کۆنگرێسی ئەمریکا پرسی دواکەوتنی گەیاندنی کەلوپەلی سەربازی بۆ پێشمەرگە تاوتوێ دەکات

ئاڤا نیوز

كاندیدێکی پێشنیازكراو بۆ فەرماندەیی سێنتكۆم، لەمیانی بەشداریكردنی لە کۆبوونەوەی کۆنگرێسدا، دانی بە دواکەوتنی گەیاندنی کەلوپەلی بەرگریی سەربازی ئەمریکی بۆ هێزەکانی پێشمەرگەی کوردستاندا نا و بەڵێنی دا کە ئەم کێشەیە چارەسەر بکرێت.

چیرۆكی سەرەكی: لە کۆنگرێسی ئەمریکا، كۆبوونەوەیەك بە ئامادەبوونی ئەدمیرال بڕاد کوپەر، پاڵێوراو لە لایەن سەرۆکی ئەمریکا بۆ سەرکردایەتیکردنی فەرماندەیی ناوەندی ئەمریکا ناسراو بە 'CENTCOM' بەڕێوەچوو.

چی ڕوویدا: لەمیانی گفتوگۆكاندا، سیناتۆر تێد باد، ئاماژەی بە دیدارەکەی لەگەڵ سەرۆکوەزیران مەسرور بارزانی، لە مانگی ئایاری ساڵی ڕابردوودا کرد، هەروەها ئاماژەی بە سەردانەکەی بۆ هەرێمی کوردستان و کۆبوونەوەی لەگەڵ بەرپرسانی هەرێمی کوردستان کرد، نیگەرانی خۆی دەربڕی سەبارەت بە دواکەوتنی گەیاندنی کەلوپەلی بەرگریی سەربازیی کە لەلایەن ئەمریکاوە دابینکراوە بۆ هێزی پێشمەرگە.

بابەتە ستراتیژییەكە: ئەدمیرال کوپەر، سەرەتا سوپاسی سیناتۆر تێد بادی کرد بۆ پاڵپشتی لە پێشمەرگە، دانی بە دواکەوتنی گەیاندنی هاوكارییە سەربازییەكانی ئەمریكا بۆ پێشمەرگە نا و دووپاتیكردەوە كە بەدواداچوونی پێویستیان بۆ ئەم بابەتە کردووە.

لێدوانی فەرمی: كوپەر لەمیانی پێشكەشكردنی وتارەكەیدا ڕایگەیاند، خۆی و ستافە تەكتیكیەكەی لەسەر زەوی، توانیویانە كار لەسەر چارەسەركردنی خاڵە ناكۆكەكان بكەن، كاری لەپێشینە بۆ نەهێشتنی ئەو جۆرە گرفتانەیە، بەو ئامانجەی لە زووترین كاتدا كەلوپەلی سەربازی بە دەستی پێشمەرگە بگەیەنین.

زانیاریی زیاتر: پاڵێوراوی ترەمپ بۆ وەرگرتنی پۆستی فەرماندەیی سێنتكۆم دووپاتیشی كردەوە، پەیوەندییەکی زۆر بەهێزیان لەگەڵ هێزی ئاسایش و سوپای عێراقیش هەیە، یارمەتیدەر دەبن لە شكاندنی بەربەستەكان و لەسەر چارەسەركردنی خاڵە ناكۆكەكان، گەشبینن.