سەرۆكایەتی شارەوانیی ئیزمیر بۆ ئاڤا: ئاگرەکەی ئیزمیر کۆنتڕۆڵ نەکراوە

ئاڤا نیوز

سەرۆكایەتیی شارەوانیی ئیزمیر دەڵێت، بە درێژایی شەوی ڕابردوو ئیزمیر لە نێو ئاگردا سووتاوە و زیاتر لە 160 خانوو بوونەتە خەڵوز و بەشێک لە هاووڵاتییانیش لە ترسی ئاگرەكە ماڵەکانیان چۆڵ کردووە، هێشتا ئاگرەکە کۆنتڕۆڵ نەکراوە و بەردەوامە .

چیرۆکی سەرەکی: ماوەی دوو ڕۆژە دارستانەکانی شاری ئیزمیری تورکیا ئاگریان گرتووە، بەرپرسانی شارەکەش دەڵێن بە هۆی بەرزبوونەوەی پلەکانی گەرمایە، تیمەکانی فریاگوزاریش بەردەوامن لە كوژاندنەوە و کۆنتڕۆڵکردنی ئاگرەکە.

لێدوانی فەرمی:  سەرۆكایەتی شارەوانیی ئیزمیر بە ئاڤا میدیای ڕاگەیاند: ئاگرەکە هێندە زۆر بووە كە بۆ نێو گەڕەکەکانیش تەشەنەی سەندووە و تا ئێستا زیاتر لە 160 خانوو و 20 ئۆتۆمبێل سووتاون و بەشێکی زۆری هاووڵاتییانیش ماڵەکانیان چۆڵ کردووە.

زانیاریی زیاتر: بەگوێرەی ئەو ڕاپۆرتەی شارەوانیی ئیزمیر بۆ ئاڤا میدیا نێردراوە، ئاگرەکە کاتژمێر، 1ـی دوای نیوەرۆی 2025-06-29 دەستی پێکردووە. سەرەڕای ئەوەی تیمەکان لە ئاسمان و زەوی خەریكی كوژاندنەوەین، كەچی تا ئێستا نەتوانراوە ئاگرەكە دابمركێنرێتەوە.