وەزارەتی ناوخۆی کوردستان: هێرشە درۆنییەکان لەلایەن گرووپی سەر بە حەشدی شەعبییەوە دەکرێن

ئاڤا نیوز

وەزارەتی ناوخۆی حکومەتی هەرێمی کوردستان، لەبارەی کەوتنەخوارەوەی درۆنە بۆمبڕێژکراوەکەی شەوی پێنجشەممەی هەولێر، ڕاگەیێنراوێکی بڵاو کردەوە و هەواڵی هەندێک میدیای ئێرانی ڕەت دەکاتەوە کە گوایە بنکەی ئیسرائیلی لە هەولێر هێرشی درۆنی کراوەتە سەر.

ڕاگەیێنراوی فەرمی: لە ڕاگەیێنراوێکدا وەزارەتی ناوخۆی حکومەتی هەرێمی کوردسنا دەڵێت، لە چەند میدیایەکی ئەلیکترۆنیی فەرمی لە ئێران،  وا بڵاوکراوەتەوە کە گوایە شەوی ڕابردوو لە هەولێر بە درۆن هێرش کراوەتە سەر بنکەیەکی سەر بە ئیسرائیل. هەموو ئەو هەواڵانە چەواشەکارین و دوورن لە ڕاستی، نە بنکەی ئیسرائیلی لە کوردستان هەن و نە ئۆپەراسیۆنی واش ئەنجام دراون.

زانیاریی زیاتر: وەزارەتی ناوخۆی کوردستان دەڵێت، شەوی رابردوو درۆنێک لە ناوچەیەکی چۆڵەوانی لە نزیک هەولێر کەوتووەتە خوارەوە. ئەم هێرشانەش لە لایەن هەندێک گرووپی سەر بە حەشدی شەعبی بە مەبەستی ئاژاوە نانەوە ئەنجام دەدرێن و پێویستە لایەنە پەیوەندیدارەکان لە حکومەتی فیدراڵی سنوورێک بۆ ئەم کارە تێکدەرانە دابنێن و رێککاری یاسایی بەرامبەر بە تاوانباران بگرنەبەر.