ترەمپ: 30 موشەکی تۆماهۆکمان ئاراستەی ئێران کرد

ئاڤا نیوز

سەرۆکی ئەمریکا وردەکاری هێرشەکەی ئەمریکا بۆ سەر ئێران لە کۆنگرەیەکی ڕۆژنامەوانیدا ئاشکرا دەکات و دەڵێت، 30 موشەکی تۆماهۆکمان ئاراستەی ئێران کرد.

لێدوانی فەرمی: دۆناڵد ترەمپ، سەرۆکی ئەمریکا ئێوارەی ئەمڕۆ لە کۆنگرەیەکی ڕۆژنامەوانیدا لەسەر سیاسەتی دەرەوەی ئەمریکا و جەنگی ئێران و ئیسرائیل و سزاکانی سەر ڕووسیا قسەی کرد و ڕایگەیاند: لە جەنگی نێوان ئێران و ئیسرائیل 30 موشەکی تۆماهۆکمان لە ژێر دەریاییەکانەوە ئاراستەی ئێران کرد و هەموویان ئامانجی خۆیان پێکا، هێرشکردنە سەر ئێران کارێکی پێویست و بەپەلە بوو هەر دەبوو کرابا.

- لە ماوەیەکی نزیکدا چارەسەری جەنگی غەزە دەکەین و کۆتایی پێدەهێنین.

- ئۆکرایناییەکان خەڵکی بەهێزن و 300 ملیار دۆلارمان پێشکەش بە کیێڤ کرد و دەبوو ئەوروپاش ئەو بڕەی پێشکەشکردایە.

- گفتوگۆ لەسەر دیاریکردنی سزاکان بۆ سە ڕووسیا دەکەین و سزاکان زۆر تووند دەبن.

- بە ڕێژەی 10% باج دەخەینە سەر وڵاتانی ئەندام لە بریکس گەر لە ئەندامبوون نەکشێنەوە.

- بنکەی پێشووی ئەمریکا " باگرام " لە ئەفغانستان ئێستا لە  لایەن چینەوە بەڕێوە دەبرێت، ئەمەش هەڵەی گەورەی بایدن بوو.

باکگراوند: لە دەیەمین ڕۆژی جەنگی ئیسرائیل و ئێران، کاتژمێر 02:30ـی بەرەبەیانیی ڕۆژی یەکشەممە 22-6-2025، واشنتن ڕاستەخۆ بەشداریی لەو شەڕەدا کرد و سێ وێستگەی ئەتۆمی لە ئێران بۆردوومان کرد.