فراکسیۆنێکی نوێ لە پەرلەمانی عێراق ڕاگەیێنرا

ئاڤا نیوز

فراکسیۆنێکی نوێ بەناوی ئاوەدانکردنەوە و گەشەپێدان کە لە سوننە و شیعە پێکهاتووە و ژمارەیان نزیکەی 60 پەرلەمانتار دەبێت، ئەمڕۆ لە پەرلەمانی عێراق ڕاگەیێنرا.

 

ئەوەی پێویستە بیزانیت: 20ـی ئایاری ئەمساڵ، محەممەد شیاع سوودانی، سەرۆکوەزیرانی عێراق و سەرۆکی ڕەوتی فوارەتەین پێکهێنانی هاوپەیمانیی ئاوەدانکردنەوە و گەشەپێدانی بۆ بەشداریکردن لە هەڵبژاردنی داهاتووی پەرلەمانی عێراق ڕاگەیاند.

 

ئەوەی ئێستا ڕوودەدات: ئەمڕۆ شەممە 2025-7-12، لەنێو هۆڵی پەرلەمانی عێراق فراکسیۆنێکی نوێ بەناوی ئاوەدانکردنەوە و گەشەپێدان کە لە سوننە و شیعە پێکهاتووە ڕاگەیێنرا.

 

لێدوانی فەرمی: فراس مەسلماوی، وتەبێژی فراکسیۆنی ئاوەدانکردنەوە و گەشەپێدان بە ئاڤا میدیای ڕاگەیاند: لە ڕێگای فراکسیۆنەکەمانەوە کاردەکەین بۆ لابردنی بەربەستەکانی بەردەم کێشەکانی نێوان هەولێر و بەغدا و دەستپێکێکی نوێی بۆ هەوڵدان چارەسەرکردنی کێشەکان.

 

زانیاریی بەدەستهاتوو: بەگوێرەی ئەو ناوانەی دەست ئاڤا میدیا کەوتووە، ئەندامانی ئەو هاوپەیمانیێتیە لە هەردوو پێکهاتەی شیعەو سوننەن و ژمارەیان بە دیاریکراوی 52 پەرلەمانتارە.

 

ئەمەش بزانە: هاوپەیمانێتی ئاوەدانکردنەوە و گەشەپێدان کە محەممەد شیاع سوودانی سەرۆکایەتی دەکات هەر یەک لە؛ ڕەوتی فوراتەین، هاوپەیمانیی عەقدی نیشتمانی، هاوپەیمانیی وەتەنییە، هاوپەیمانیی ئیبداعی کەربەلا، کۆمەڵەی وڵاتی سۆمەر، کۆمەڵەی ئەجیال و هاوپەیمانیی چارەسەری نیشتمانی لەخۆ دەگرێت.