پەرلەمانی عێراق بۆ یەکلاییکردنەوەی چەند پۆست و یاسایەکی گرنگ کۆدەبێتەوە

ئاڤا نیوز

پەرلەمانی عێراق دانیشتنی ژمارە دووی خۆی لە وەرزی یاسادانانی دووەمدا ئەنجام دەدات، بەپێی کارنامەی دانیشتنەکە، پەرلەمان دەنگ لەسەر چەندین بڕگە و پڕۆژەیاسای گرنگ دەدات، کە دیارترینیان یەکلاییکردنەوەی چارەنووسی سەرۆک و ئەندامانی ئەنجوومەنی ڕاژەی گشتیی فیدراڵی و هەروەها دەنگدانە لەسەر سەرۆکی ئەنجوومەنی دەوڵەت.

بڵاوکراوەی فەرمی: بەگوێرەی کارنامەی دانیشتنەکانی ئەمڕۆ دووشەممە، 14ـی تەمموز بڕگەی یەکەمی دانیشتنەکە دەنگدان دەبێت لەسەر سەرۆک و ئەندامانی ئەنجوومەنی ڕاژەی گشتیی فیدراڵی و  برگەی دووەمیش دەنگدان دەبێت لەسەر سەرۆکی ئەنجوومەنی دەوڵەت.

ئەوەی پێویستە بیزانیت: پێشتر لیژنەی پلاندانانی پەرلەمانی داوای کردبوو پەلە بکرێت لە یەکلاییکردنەوەی دۆسیەی دەنگدان لەسەر سەرۆک و ئەندامانی ئەنجوومەنی ڕاژەی فیدراڵی، کە سەرۆک و ئەندامانی ئەنجوومەنەکە ئێستا بە شێوەی وەکالەت کارەکانیان بەڕێوە دەبەن.

لە هەمان کاتدا: هەر لە دانیشتنەکەی ئەمڕۆی پەرلەمان دەنگ لەسەر پڕۆژەیاسای هەموارکردنی یاسای یەکسانکردنی بڕوانامەکان و پڕۆژەیاسای پەسەندکردنی ڕێککەوتنی هاندان و پاراستنی وەبەرهێنان لەگەڵ سعوودیە، دەدرێت.

لەلایەکی دیکەوە: بڕیارە خوێندنەوەی دووەم و گفتوگۆ بۆ پڕۆژەیاسای هەموارکردنی یاسای وەزارەتی پەروەردە، پڕۆژەیاسای پاراستنی ژینگە، و پڕۆژەیاسای بەشداربوونی عێراق لە ڕێککەوتنی نەتەوە یەکگرتووەکان بۆ یاسای دەریاکان، بکرێت.