دۆخی سوەیدا تا دێت ئاڵۆزتر دەبێت و ئاماری کوژراوەکانیش بەرزتر دەبێتەوە

ئاڤا نیوز

پارێزگای سوەیدا لە ماوەی 24 کاتژمێری ڕابردوودا قۆناغێکی نوێی تووندوتیژیی خوێناویی بەخۆیەوە بینی، بەپێی ئامارەکان تاوەکو ئێستا زیاتر لە 40 کەس کوژراون و نزیکەی 100 کەسی دیکەش بریندار بوون.

چیرۆکی سەرەکی: چەند ڕۆژێکە شەڕ و پێکدادانێکی تووند لەنێوان گرووپە چەکدارە خۆجێیەکان لە گەڕەکی 'مەقوەس'ـی شاری سوەیدا و خێڵە بەدەوییەکان بەردەوامە، هەردوولا چەکی قورس وەک هاوەن، ئار بی جی و دۆشکەیان لە دژ یەک بەکارهێناوە.

زانیاریی بەدەستهاتوو: بەگوێرەی ئەو زانیارییانەی ڕوانگەی سووری بۆ مافەکانی مرۆڤ بە ئاڤا میدیای داوە، تووندوتیژییەکان لە گوندەکانی ڕۆژئاوای سوەیدا و گەڕەکی مەقوەسی شاری سوەیدا چڕبوونەتەوە، کە تۆپبارانی هاوبەش و هێرشی فڕۆکەی بێفڕۆکەوانیان بەخۆوە بینیوە. حکومەتی دیمەشقیش هێزی سەربازیی زیاتری ڕەوانەی ناوچەکە کردووە بۆ پشتیوانی لە هێزەکانی.

هۆکارە زانراوەکان: بەگوێرەی ڕوانگەی سووری، سەرچاوەی کێشەکان بۆ زنجیرەیەک ڕووداوی ڕفاندنی دوولایەنە دەگەڕێتەوە، کە دوای دەستدرێژیکردنە سەر گەنجێکی خەڵکی سوەیدا لەلایەن چەکدارانی عەشایەرەکانەوە، دەستیپێکرد.

لەلایەکی دیکەوە: بەرەبەیانی ئەمڕۆ وەزارەتی ناوخۆی سووریا لە ڕاگەیێنراوێکدا نیگەرانیی قووڵی خۆی سەبارەت بە پێکدادانە خوێناوییەکانی پارێزگای سوەیدا دەربڕی و ئاماژە بەوەدا لە کە زیاتر لە 30 کەس کوژراون و نزیکەی 100 کەسی دیکەش بریندابوونە.

وەزارەتەکە جەختی کردەوە کە بە هەماهەنگی لەگەڵ وەزارەتی بەرگری، "دەستێوەردانێکی ڕاستەوخۆ" ئەنجام دەدەن بۆ کۆتاییهێنان بە پێکدادانەکان، سەپاندنی ئاسایش و ڕاوەدوونانی ئەوانەی لە پشت ڕووداوەکانەوەن.

دوای دەستوەردانی هێزەکانی ناوخۆ و وەزارەتی بەرگریی سووریا بۆ کۆنترۆڵکردنی دۆخەکە، پێکدادان لەنێوان گرووپەکان و هێزەکانی سوپا دروستبوو، ژمارەیەک لە هێزەکانی سەر بە سووپای سووریا لە ڕووبەڕووبوونەوەیان لەگەڵ گرووپەچەکدارەکان کوژران.