هەسەدە هێرشەکانی سەر سوەیدا شەرمەزار دەکات و داوای ڕاگرتنی دەستبەجێی دەکات

ئاڤا نیوز

هێزەکانی سووریای دیموکرات (هەسەدە) لە ڕاگەیەندراوێکدا، بە تووندی ئەو هێرش و دەستدرێژییانەی شەرمەزار کرد کە دەکرێنە سەر گوند و شارۆچکەکانی پارێزگای سوەیدا. هەسەدە داوای ڕاگرتنی دەستبەجێی ئەو هێرشانە دەکات و بە "پاشەکشەیەک بۆ هیوا و ئاواتەکانی سوورییەکان"ـی دادەنێت.

چیرۆکی سەرەکی: چەند ڕۆژێکە شەڕ و پێکدادانێکی تووند لەنێوان گرووپە چەکدارە خۆجێیەکان لە گەڕەکی 'مەقوەس'ـی شاری سوەیدا و خێڵە بەدەوییەکان بەردەوامە، هەردوولا چەکی قورس وەک هاوەن، ئار بی جی و دۆشکەیان لە دژ یەک بەکارهێناوە.

ڕاگەیێنراوی فەرمی: لە ڕاگەیەندراوەکەی ناوەندی ڕاگەیاندنی هەسەدەدا هاتووە، ئەو هێرشانە بوونەتە هۆی "گیانلەدەستدانی ژمارەیەک لە ڕۆڵەکانی ناوچەکە و سووتاندن و تاڵانکردنی دەیان ماڵ و کێڵگەی هاووڵاتیانی مەدەنی."

هەسەدە نیگەرانیی قووڵی خۆی دەربڕیوە لە "هێرشە دووبارەکان بۆ سەر گەلەکەمان لە سوەیدا و ئەو هەراسانکردنە بەردەوامەی کە لە ژیان و هاتووچۆ و ئیرادەیاندا ڕووبەڕووی دەبنەوە."

زانیاریی زیاتر: هێزەکانی سووریای دیموکرات داوا دەکات کە "ئەو هێرشانە بوەستێنرێن و دڵنیایی بدرێت لە دووبارەنەبوونەوەیان." هەروەها جەختی کردووەتەوە لە پێویستیی "ڕەخساندنی دەرفەتی تەواو لەبەردەم دەستپێشخەرییە نیشتمانییەکاندا بۆ چارەسەرکردنی هەموو پرسەکان، بە شێوەیەک کە لەگەڵ بەدیهێنانی خواستەکانی هەموو پێکهاتەکانی گەلی سووریادا بگونجێت."

ئەوەی پێویستە بیزانیت: بەپێی ئامارەکانی ڕوانگەی سووری بۆ مافەکانی مرۆڤ بەهۆی پێکدادانەکانەوە لە سوەیدا،  تاوەکو ئێستا زیاتر لە 40 کەس کوژراون و نزیکەی 100 کەسی دیکەش بریندار بوونە.