هاتووچۆی گەشتیاری بۆ ئێران ئاسایی بووەتەوە

ئاڤا نیوز

 

دوای ماوەیەک لە سستبوونی هاتوچۆی گەشتیاری لە دەروازەکانی نێوان هەرێمی کوردستان و ئێران، ئێستا هاتوچۆی گەشتیاری ئاسایی بووەتەوە، بەڵام بەشی زۆری ئەوانەی بۆ ئێران دەچن بەمەبەستی نەخۆشی و سەردانە.

 

وێنە گەورەکە: بەهۆی شەڕی 12 ڕۆژی نێوان ئێران و ئیسرائیل هاتوچۆ لە هەرێمی کوردستانەوە بۆ ئێران تا ئاستێکی زۆر سست بوو، بەڵام ئێستا هاتوچۆ ئاسایی بووەتەوە.

 

لێدوانی فەرمی: سالار تەحسین، بەڕێوەبەری نشینگە و پاسپۆرت لە دەروازەی نێودەوڵەتی حاجی ئۆمەران بە ئاڤا میدیای وت، ئەگەرچی ئێستا بەراورد بە مانگەکانی پێش شەڕ هاتوچۆ تا ڕادەیەک کەمترە، بەڵام هاتوچۆ ئاساییە و خەڵکێکی زۆر بۆ سەردانی پزیشک و کەسوکار و تەنانەت گەشتیاریش هاتوچۆ دەکەن. هێشتا ئەمساڵ هیچ ئامارێک لەبەردەست نییە، بەڵام ساڵی ڕابردوو یەک ملیۆن و 260 هەزار کەس هاتوچۆیان کردووە و ئەم ئامارە بەراورد بە ساڵی پێش خۆی زیادی کردووە.

 

باکگراوند: لە هەرێمی کوردستان شەش دەروازەی فەرمی دانپێنراو هەیە، ئەوانیش دەروازەکانی ئیبراهیم خەلیل، حاجی ئۆمەران، باشماخ، پەروێزخان، فڕۆکەخانەی نێودەوڵەتی هەولێر، فڕۆکەخانەی نێودەوڵەتیی سلێمانی. لەگەڵ ئەوەدا چەندین دەروازەی دیکەی وشکانی هەیە دانپێنراو نین.