پەرلەمانی عێراق بۆ دەنگدان لەسەر چەند پڕۆژەیاسایەک کۆدەبێتەوە

ئاڤا نیوز

ئەنجوومەنی نوێنەرانی عێراق دانیشتنی ژمارە دووی خۆی لە وەرزی دووەمی یاسادانان ئەنجام دەدات و کارنامەی دانیشتنەکە چەندین بابەتی گرنگی ئابووری، پەروەردەیی و یاسایی لەخۆدەگرێت، لەوانە: دەنگدان لەسەر دوو پڕۆژەیاسای ستراتیژی و خوێندنەوەی دووەم بۆ چوار پێشنیاز و پڕۆژەیاسای دیکە.

 

ڕاگەیێنراوی فەرمی: بەگوێرەی کارنامەی دانیشتنەکە کە بڕیارە ئەمڕۆ چوارشەممە، 16ی تەممووزی 2025، کاتژمێر یەکی پاشنیوەڕۆ بەڕێوەبچێت، ئەم بڕگە و بابەتانەی خوارەوە لەخۆدەگرێت:

 

-لە بڕگەی یەکەمدا دەنگدان لەسەر پێشنیازی یاسای هەموارکردنی یەکەمی یاسای بنەماکانی یەکسانکردنی بڕوانامە و پلە زانستییە عەرەبی و بیانییەکانی ژمارە (20)ی ساڵی 2020 دەدرێت.

 

- لە بڕگەی دووەمدا، دەنگ لەسەر پڕۆژەیاسای پەسەندکردنی ڕێککەوتنی هاندان و پاراستنی دوولایەنەی وەبەرهێنان لەنێوان حکومەتی عێراق و حکومەتی سعودیە دەدرێت.

 

لەلایەکی دیکە: لە بەشێکی دیکەی دانیشتنەکەدا، خوێندنەوەی دووەم و گفتوگۆ بۆ چوار پڕۆژەیاسای گرنگ دەکرێت، کە بریتین لە:

 

•  پێشنیازە یاسای هەموارکردنی یەکەمی یاسای وەزارەتی پەروەردە.
•  پێشنیازە یاسای پاراستن و باشترکردنی ژینگە.
• پڕۆژەیاسای چوونەپاڵی کۆماری عێراق بۆ ڕێککەوتنی جێبەجێکردنی بەشی یازدەیەمی ڕێککەوتنی نەتەوەیەکگرتووەکان بۆ یاسای دەریاکان.
•   پێشنیازە هەموارکردنی یاسای ئەنجوومەنی نوێنەران و پێکهاتەکانی.