مالیکی: قەیرانە سیاسییەکان هەڕەشە لە سیستمی دەستووریی عێراق دەکەن

ئاڤا نیوز

سەرۆکوەزیرانی پێشووتری عێراق دەڵێت، قەیرانە سیاسییەکان و کۆتوبەندکردنی ئازادی ڕۆژنامەوانی، دوو هەڕەشەی دیارن بۆسەر سیستمی دیموکراسی و دەستووریی عێراق.

وێنە گەورەکە: عێراق یەکێکە لەو وڵاتانەی ئازادی ڕۆژنامەوانیی و پێشێلکردنی مافەکانی مرۆڤ تێیدا لە ئاستێکی خراپدایە، بەپێی ڕیزبەندیی ئەمساڵی ڕێکخراوی "پەیامنێرانی بێسنوور" لەکۆی 180 وڵاتی ناو ڕیزبەندییەکە، عێراق لە ئازادی کاری ڕاگەیاندن و ڕۆژنامەوانی لە ڕیزبەندی 155ەمینی وڵاتانی جیهان دایە.

بڵاوکراوەی فەرمی: نوری مالیکی، سەرۆکی هاوپەیمانی دەوڵەتی یاسا و سەرۆکوەزیرانی پێشووتری عێراق لە پەیامێکدا ئاماژەی بەوەکرد، دامەزراوەکانی یاسادانان، جێبەجێکردن و دادوەریی بەرامبەر قەیرانە سیاسییەکان و کۆتوبەندکردنی ئازادی ڕادەبڕین لە بێدەنگییەکی مەترسیداردان.

ئەوەشی خستووەتەڕوو، دەزگاکانی ڕاگەیاندن و میدیای ئازاد دیارترین سیمای وڵاتی دەستوور و ژیانی دیموکراسین، بۆیەش سیاسەتی بێدەنگکردن و لێپرسینەوە لەگەڵ ڕۆژنامەنووسان لەسەر وشە و ڕەخنەگرتن، دەبێتە هۆی زیادبوونی قەیرانەکان و ئاسایشی کۆمەڵایەتیش دەخاتە مەترسییەوە.