هاوپەیمانیی تەقەدوم بایکۆتی دانیشتنەکانی پەرلەمانی کرد

ئاڤا نیوز

هاوپەیمانیی تەقەدوم، بایکۆتکردنی سەرجەم دانیشتنەکانی ئەنجوومەنی نوێنەرانی عێراقی ڕاگەیاند و هۆکاری بڕیارەکەشی بۆ ناڕەزایەتی دەربڕین بەرامبەر بەو شێوازەی کە ناوی ناوە "خەڵەتاندنی" پەرلەمانتاران، لە ڕێگەی زیادکردنی بڕگەی کتوپڕ و ناکۆکی لەسەر بۆ کارنامەی دانیشتنەکان گەڕاندووەتەوە.

چیرۆکی سەرەکی: لە دانیشتنی ڕۆژی چوارشەممە 2025-7-16ـی پەرلەمانی عێراق، بڕگەی خوێندنەوەی دووەم بۆ پرۆژەیاسای دەستەی حەشدی شەعبی لە کارنامەی دانیشتنەکە زیادکرا، ئەمەش ناڕەزایەتی لایەنە کوردی و سوننییەکانی لێکەوتەوەو هۆڵی پەرلەمانیان جێهێشت.

ڕاگەیێنراوی فەرمی: لە ڕاگەیێنراوێکدا کە لەلایەن یەحیا محەممەدی، وتەبێژی فەرمیی هاوپەیمانێتییەکەوە دەرچووە، هاتووە: "ناڕەزایەتی و ڕەتکردنەوەی خۆمان بۆ شێوازی 'خەڵەتاندنی' ئەندامانی بەڕێزی ئەنجوومەنی نوێنەران ڕادەگەیەنین."

لە هەمان کاتدا: محەممەدی ڕوونیکردووەتەوە کە کارنامەی دانیشتنەکان 48 کاتژمێر پێشتر بە ڕێککەوتن ڕادەگەیەندرێت، بەڵام "دواتر و لە کاتی دانیشتنەکەدا دوای تەواوبوونی نیساب، بڕگەی نوێی ناکۆکی لەسەر دەخرێتە ناو کارنامەکەوە بەبێ ئاگاداریی زۆرێک لە پەرلەمانتارە ئامادەبووەکان و بەبێ ئەوەی ئەو یاسایانە بە لیژنە پەیوەندیدارەکاندا تێپەڕن، تەنانەت بەبێ هیچ ڕێککەوتنێکی سیاسی."

کاریگەریی و لێکەوتەکان: "سەرکردایەتیی تەقەدوم بڕیاریدا بە بایکۆتکردنی ئامادەبوون لە هەر دانیشتنێکی ئەنجوومەنی نوێنەران، تا ئەو کاتەی پابەندبوونێکی تەواو بە کارنامەی پێشوەختە ئامادەکراو و لەسەر ڕێککەوتوو دەسەلمێندرێت."