پەرلەمانی تورکیا هێرشەکانی ئیسرائیل بۆ سەر سووریا تاوتوێ دەکات: لەپاڵ گەلی سووریای براین

ئاڤا نیوز

 

پەرلەمانی تورکیا هێرشەکانی ئیسرائیل بۆ سەر سووریا ئیدانە دەکات و داوا لە کۆمەڵگەی نێودەوڵەتی دەکات بێتە دەنگ. هاوکات پشتیووانی وڵاتەکەی بۆ سووریا دووپاتدەکاتەوە و دەڵێت، "لەپاڵ گەلی سووریاداین".

 

وێنە گەورەکە: لە  ڕۆژی یەکشەممەوە 13-7-2025، شەڕ و  پێکدادان لە نێوان هێزەکانى سەر بە حکومەتى سووریا و چەکدارانى درووز لە پارێزگاى سوەیداى باشوورى ئەو وڵاتە دەستیپێکردووە. جیا لەو پێکدادانە، ئیسرائیلیش دەستێوەردانی لەو شەڕەدا کرد بە بۆردوومانکردنی باڵەخانەی وەزارەتی بەرگریی سووریا.

 

ئەوەی پێویستە بیزانیت: بەگوێرەی میدیاکانی تورکیا ڕۆژی چوارشەممە لە کۆبوونەوەی پەرلەمانی تورکیا هێرشەکانی ئیسرائیل بۆ سەر سووریا تاوتوێ کران.

 

بڵاوکراوەی فەرمی: دوای کۆبوونەوەکە، پەرلەمانی تورکیا ڕایگەیاند، هێرشەکانی ئیسرائیل بۆ سەر سووریا و لەسەرووی هەموویانەوە بۆ سەر دیمەشقی پایتەخت بە توندترین شێوە ئیدانە دەکەین و دووبارەی دەکەینەوە کە لە پاڵ گەلی سووریاداین.

 

-جەخت لە یەکپارچەیی خاک و سەروەریی سووریا دەکەینەوە و دژایەتی خۆشمان بۆ هەر چەشنە کردەوەیەک کە ئارامی گەلی دۆست و برای سووریامان تێک بدات و ببێتە هەڕەشە لەسەریان، دەردەبڕین.

 

-داوا لە کۆمەڵگەی نێودەوڵەتی دەکەین کە بێتە دەنگ و ڕێوشوێنی کاریگەر و بەردەوام و یەکلاکەرەوە لە دژی دەستدرێژیی ئیسرائیل بگرێتەبەر، کە قەیرانی ناوچەکەی قووڵتر کردووەتەوە و هەڕەشە لە ئاشتی جیهانیی دەکات.

 

لەلایەکی دیکە: هاوکات هاکان فیدان، وەزیری دەرەوەی تورکیا ئەمڕۆ پێنجشەممە لە ئەنجوومەنی ئاسایشی نەتەوەیەکگرتووەکان گوتی، ئیسرائیل ستراتیژی دەستدرێژی خۆی نەک تەنیا لە فەلەستین، بەڵکو لە لوبنان و سووریا و ئێرانیش جێبەجێ کردووە.

 

ژمارەکان وادەڵێن: ڕوانگەی سووری بۆ مافەکانی مرۆڤ بڵاویکردەوە، لە ماوەی پێنج ڕۆژدا ژمارەی کوژراوان بەم شێوەیەیە:

 -79 چەکداری درووز.
-55 هاووڵاتی مەدەنی.
 -189 سەربازی هێزەکانی سووریا. 
- 18 کەسی پێکهاتەی بەدەوی.
-15 سەربازی هێزەکانی سووریا لە هێرشە ئاسمانییەکانی ئیسرائیل کوژراون.