سەرۆکایەتیی ڕۆحیی درووزەکان داوای کردنەوەی ڕێڕەوێک لەگەڵ کورد و ئوردن دەکات

ئاڤا نیوز

سەرۆکایەتیی ڕۆحیی درووزەکان، شاری سوەیدای سووریای وەک ناوچەیەکی "کارەساتبار" ناساند و ماتەمینیی گشتیی ڕاگەیاند. هاوکات داوای کردنەوەی ڕێڕەوێکی مرۆیی کرد "بەرەو برایانی کورد" و داواشی لە شا عەبدوڵڵای دووەمی پاشای ئوردن کرد کە دەروازەیەکی سنووری لەگەڵ سوەیدا بکاتەوە.

 

چیرۆکی سەرەکی: دوای نزیکەی 90 کاتژمێر لە پێکدادانی تووند لەنێوان درووزەکان و هێزەکانی سەر بە حکومەتی سووریا لە پارێزگای سوەیدا دەوروبەری، هاوکات دەستوەردانی هێزی ئاسمانیی ئیسرائیل بۆ ڕاگرتنی هێرشی هێزەکانی سەر بە حکومەتی سووریا بۆ سەر درووزەکان، 360 کەس کوژران.

 

ڕاگەیێنراوی فەرمی: بەگوێرەی ڕاگەیێنراوی سەرۆکایەتییەکە، ئەم هەنگاوانە دوای هێرشێکی "ترسناک و دڕندانە"ی ڕێکخراوێکی تیرۆریستی دێت کە هاووڵاتییانی سڤیلی کردووەتە ئامانج و بووەتە هۆی کوژرانی ژمارەیەکی زۆر لە خەڵکی ناوچەکە.

 

لە هەمان کاتدا: سەرۆکایەتییەکە جەختی لە گرنگیی مرۆیی ئەو ڕێڕەوانە کردەوە لەم بارودۆخە سەختەدا بۆ کەمکردنەوەی ئازاری هاووڵاتییان. هەروەها داوا لە خەڵکی سوەیدا دەکات یەکڕیز بن، پشتیووانیی کەسوکاری قوربانییەکان بکەن و برینەکانیان بە هۆشیاری و خۆشەویستی ساڕێژ بکەن.

 

سەرۆکایەتییەکە ڕایگەیاند: "سوەیدا خوێنی لێ دەچۆڕێت، بەڵام هەرگیز ناشکێت و بە شکۆ و یەکڕیزیی خەڵکەکەیەوە سەربەرزانە دەمێنێتەوە."

ئەوەی پێویستە بیزانیت: بەگوێرەی ڕوانگەی سووری بۆ مافەکانی مرۆڤ لەماوەی ئەو 90 کاتژمێرەدا 360 کەسی کوژراون، هاوکات زانیاری هەیە لەسەر بوونی دەیان کوژراوی دیکە لە هاووڵاتیانی سڤیل و چەکدارە درووزەکان و ئەندامانی هێزە حکومییەکان.

 

ئەمەش بزانە: ئەو ڕاگەیێنراوەی سەرۆکایەتیی ڕۆحیی درووزەکان لە کاتێکدایە، بەرەبەیانی ئەمڕۆ سەرۆککۆماری سووریا، درووزەکانی بە "بەشێکی ڕەسەنی نیشتمان" ناوبردن و ڕایگەیاند، بەرپرسیارێتیی پاراستنی ئاسایشی پارێزگای سوەیدا سپێردراوە بە گرووپە ناوخۆییەکان و شێخەکانی درووز.